Jýrnalıst Rınat Dosymov týǵan kúninde máńgilik saparǵa attandy
ASTANA. KAZINFORM — Búgin Kazinform aqparat agenttiginiń redaktsııasy orny tolmas qazaǵa dýshar boldy. Bizdiń adal dos, áriptes, shyǵarýshy redaktor Rınat Dosymov ómirden ótti. Rınat 15 tamyz kúni 43 jasynda… óziniń týǵan kúninde máńgilik saparǵa attandy.
Ol túrli basylymdarda jýrnalıst, sholýshy, arnaıy joba jetekshisi, redaktor bolyp jumys istedi. Jýrnalıstıkada shamamen 20 jyl eńbek etti, onyń eleýli bóligi Kazinform agenttiginde ótti. Joǵary kásibıligi, uqyptylyǵy jáne minsiz jaýapkershiligi, qyzmetine degen adaldyǵy úlgi tutarlyq edi.
— Bizge qaraly habar jetti. Qorqynyshty. Aýyr qaıǵy. Rınat Dosymov ómirden ótti. Jaqsy adam edi. Búgin, 15 tamyz onyń týǵan kúni edi… Rınat kópshilikke ózin jarııa etip, kórsete bermeıtin. Óz áleminde, tynyshtyqta ómir súrip, eń qymbatyn qorǵashtaıtyn. 2012 jyly otyz jasynda elordaǵa qonys aýdardy. Qıyndyqty eńsere otyryp, kásibı maman deńgeıine jetti…
Al búgin máńgilikke attandy. Tym jas edi. Imany salamat bolsyn. Jany jánnátta bolsyn. Aldy jaryq bolsyn, — dep jazdy Rınattyń dosy, qoǵam qaıratkeri, pýblıtsıst, pedagog, Jýrnalıster odaǵynyń múshesi Álııa Ahetova.
Biz úshin Rınat Dosymov jaı ǵana áriptes emes edi. Ol júregi jyly, ázildeı biletin, kez kelgen jaǵdaıda qoldaıtyn sóz taba biletin adam bolatyn. Árdaıym qoldaý kórsetip, keńes berip, qıyn sátte járdemdesýge ýaqyt tabatyn.
— Rınat meniń esimde árdaıym kúlimsiregen, jarqyn adam retinde qalady. Aıtqan áńgimesi de, jan dúnıesi de jyly, al jumysta talapshyl. Ol óte kishipeıil edi, týǵan qalasy Kókshetaýda ony jaqsy bilse de, Astanada biz onyń talantyn birden tanı qoıǵan joqpyz. Syrttaı qarapaıym kóringenimen, jan dúnıesi baı bolatyn: mýzykany janyndaı jaqsy kóretin, kásibı deńgeıde án aıtatyn, kóptegen baıqaý men festıvalderdiń laýreaty jáne jeńimpazy bolǵan. Poezııa aýylynan da alys emes, saıahattaǵandy jaqsy kóretin, — dep eske alady Kazinform shyǵarýshy redaktory Janar Muhamedııarova.
Óte kishipeıil jan edi. Sońyna deıin bizben baılanysta bolyp, jumysymyz qalaı júrip jatqanyn surap, alańdap otyrdy. Bul Kazinform agenttigi úshin de, árqaısymyz úshin de orny tolmas qaza.
Ol eńbegine, qyzmetine adal edi. Tyńdaı da, túsine de biletin, shabyttandyryp, alǵa jeteleıtin. Onymen ár kezdesýden keıin shabyt alyp qaıtatyn edik.
— Qaraly habar jetti. Rınat Dosymov mezgilsiz dúnıeden ótti, ol kóp jyl boıy Kazinform agenttiginde shyǵarýshy redaktor bolyp jumys istedi. Jas, ómirge qushtar, óz isin óte jaqsy kóretin. Tatar, polıak, qazaq bir boıynda toǵysqan jigit edi. Óte jaqsy adam, myqty jýrnalıst edi. Ýryny җánnáttá, rýhy tynych, týfragy җıńel býlsyn! — dep jazdy Facebook-te Prezıdent janyndaǵy Ortalyq kommýnıkatsııalar qyzmetiniń dırektory Asqar Omarov.
Rınat - sózge sheber, talantty redaktor, ómirdi, dostyqty jáne qarapaıym qýanyshty baǵalaı bilgen adam retinde este qalady.
— Men úshin Rınat jaı ǵana áriptes emes, qyzmettegi úzeńgiles serigim, dosym edi… Biz onymen 10 jyl qatar, ıyq tirese jumys istedik. Osy ýaqyt ishinde ol meni ózi uıymdastyrǵan baıqaýlar men shyǵarmashylyq keshterge keıde qatysýshy, keıde qazylar alqasynyń múshesi retinde qatysýǵa shaqyrdy. Tatar jáne polıak mádenıetimen, ádebıetimen, shyǵarmashylyq tulǵalarmen tanystyrdy. Ózi de sondaı edi, án aıtqandy, óleń jazǵandy, armandaǵandy unatatyn…
Áriptes retinde árdaıym qoldaý kórsetetin, biraq keıde maqala taqyryby nemese grammatıka, fotosýret úshin saǵattap daýlasatyn edik. Kóbirek maqala jarııalaý boıynsha ózara básekelestik boldy, osylaısha bir-birimizdi shıratyp otyrdyq. Onyń joqtyǵy qatty seziledi. Men úshin Kazinform agenttigindegi jumys árdaıym onyń esimimen baılanysty bolady. Biraq bárimiz de fánıde máńgi emespiz… Alla taǵalaǵa da jaqsy adamdar kerek shyǵar. Imandy bol, janyń jánnátta bolsyn, meniń eń jaqsy serigim — Rınat, — deıdi Kazinform orys redaktsııasynyń shyǵarýshy redaktory Gúlmıra Baızakova.
Onyń jarqyn beınesi týystarynyń, dostarynyń jáne áriptesteriniń júreginde máńgi saqtalady. Biz marqumnyń otbasy men jaqyndaryna qaıǵyra kóńil aıtamyz.
Kazinform redaktsııasy