Jýrnalıst Muhtar Túmenbaı dúnıeden ótti

ASTANA. KAZINFORM — Belgili jýrnalıst Muhtar Túmenbaı 55 jasqa qaraǵan shaǵynda qaıtys boldy. 

Muhtar Túmenbaı 1970 jyly 11 tamyzda dúnıege kelgen. Ol — belgili jazýshy Jaqsylyq Túmenbaevtyń uly. ál-Farabı atyndaǵy Qazaq ulttyq ýnıversıtetinde bilim alǵan. Eńbek jolynda birqatar basylym men respýblıkalyq telearnalarda qyzmet atqarǵan. «Qazaqstan» telearnasyndaǵy «Apta» aqparattyq-saraptamalyq baǵdarlamasynyń júrgizýshisi boldy. Sondaı-aq ol «Mánshúk. Ákege arasha túsken qyz», «Tórt qaısar», «Álııa. Erlik algorıtmi» syndy soǵys qaharmandaryna arnalǵan derekti fılmderdiń avtory.

Mádenıet jáne aqparat mınıstrligi belgili jýrnalıst, jazýshy, otandyq aqparat keńistiginde óz qoltańbasyn qaldyrǵan tulǵa Muhtar Túmenbaıdyń dúnıeden ozýyna baılanysty otbasy men týǵan-týystaryna, barsha áriptesterine qaıǵyra kóńil aıtty.

— Muhtar Jaqsylyquly — óziniń shyǵarmashylyǵy men azamattyq ustanymymen el esinde qalǵan tulǵa edi. Ol qazaq jýrnalıstıkasynyń damýyna súbeli úles qosyp, talaı mańyzdy baǵdarlamalar men derekti fılmderdiń avtory atandy. Ásirese, «Apta» aqparattyq-saraptamalyq baǵdarlamasy arqyly eldegi mańyzdy oqıǵalarǵa tereń taldaý jasap, kórermenniń qurmetine bólendi. Sondaı-aq, tarıhı-patrıottyq derekti fılmderi jas urpaqtyń boıyna otansúıgishtik rýh darytyp, el tarıhyn umytpaýǵa úndedi. Ardaqty azamattyń adamdyq bolmysy, kásibı biliktiligi — keıingi býyn qalam ustaǵan jastarǵa árdaıym úlgi bolyp qala bermek. Marqumnyń jatqan jeri jaıly, topyraǵy torqa bolsyn! Allanyń raqymy men meıirimi joldas bolyp, rýhy peıishte shalqysyn, — delingen mınıstrlik habarlamasynda.