Júrgizýshi kýrsyn onlaın oqytý toqtatylady
ASTANA. KAZINFORM – Júrgizýshi kýáligin alýǵa óz betinshe daıyndalý jáne onlaın oqý tetigi joıyldy. Oqý kýrsyn aıaqtaǵany týraly kýálikti elektrondy nusqaǵa tolyq kóshirý júrgizilip jatyr. Bul týraly QR ІІM Ákimshilik polıtsııa komıtetiniń tóraǵasy Qaısar Sultanbaev aıtty.
«Júrgizýshilerdi daıarlaý sapasy syn kótermeıdi. Taldaý kórsetkendeı, jol apattarynyń negizgi sebebi áli de kólik tártibiniń tómendigi bolyp otyr. Keltirilgen sandar da osyny dáleldeıdi. Mysaly, 10 mıllıonnan astam jol erejesin buzýdyń jolyn kesý nemese 20 myńnan mas júrgizýshini ustaý derekteri sony kórsetedi. Halyqtyń basym bóligi – zańǵa baǵynatyndar. Biraq mas kúıinde kólik júrgizýge, jol erejesin turaqty túrde buzýǵa jol beretin halyqtyń belgili bir sanaty polıtsııanyń baqylaýynda bolady. Bul jaǵdaıǵa avtomektepterge qoıylatyn talaptardyń tómendigi jáne júrgizýshilerdi daıarlaý sapasy yqpal etken», - dedi komıtet basshysy.
Sondaı-aq Qaısar Sultanbaev budan bylaý júrgizýshi kýáligin alarda oqý kýrsynyń kýáligin alý talaptary kúsheıtiletinin atap ótti.
«Júrgizýshilerdiń sapasyn arttyrý maqsatynda ýákiletti jáne múddeli memlekettik organdar sharalar qabyldady. Júrgizýshilerdiń óz betinshe daıyndalýyn jáne onlaın oqýyn alyp tastadyq. Avtomektepterdi jáne úmitkerlerdi tirkeý ishki ister mınıstrliginiń aqparattyq júıesinde júrgizilip otyrady. Bul úmitkerlerge oqý kýrstaryn aıaqtaý týraly kýálikterdi merziminen buryn berý jáne olardy qoldan jasaý múmkindigin boldyrmaıdy. Oqý kýrsyn aıaqtaǵany týraly kýálikti elektrondyqq nusqaǵa tolyq kóshirý boıynsha jumys atqarylýda. Ol óz kezeginde jalǵan kýálik alýdy nemese olardy formaldy túrde alýdy boldyrmaıdy», - dedi ákimshilik polıtsııa komıtetiniń tóraǵasy.
Aıta keteıik, elimizde «Jasyryn patrýl» júıesi engizilip jatyr.
Sondaı-aq, budan bylaı adam tasymalymen tek jeke tasymaldaýshy retinde tirkelgen tulǵalar ǵana aınalysa alatyn bolady.
Odan bólek, arnaıy taný belgisin taqpaǵan elektromobıl júrgizýshilerine qansha somada aıyppul salynatynyn jazǵan edik.
Endi elimizde zııandy tútin shyǵaratyn kólikter kamera arqyly anyqtalmaq.
