Júregin aýystyrǵan astanalyq áıel: Ómirdiń ár mınýtyn baǵalaımyn
«Meniń júregim 2015 jyly aýystyryldy. Júrektegi aqaý bala bosanǵannan keıin bastaldy. Bastapqyda dári-dármek iship emdelip júrdim, ol jyldary elimizde júrek transplantatsııasy asa damı qoımaǵan edi. 2011 jyly alǵash ret osy elordadaǵy Ulttyq ǵylymı kardıohırýrgııa ortalyǵynda jasandy júrek qabyqshasy apparaty ornatyldy. Ol donor tapqansha ómir súrýime úlken septigin tıgizdi. Elimizde júrek transplantatsııasy 2012 jyly alǵash ret jasaldy. Maǵan donor tabylǵansha kútýge týra keldi, sóıtip 2015 jyldyń 1 maýsymynda júregim aýystyryldy», - deıdi elorda turǵyny Gúlmıra Smaılova.
Sondaı-aq, jańa júrek ıesi ózine donor bolǵan azamat pen onyń jaqyndaryna alǵysyn bildirdi.
«Árıne, meni qutqarǵan janǵa alǵystan basqa aıtarym joq. Oǵan júregin donor etýge ruqsat bergen jaqyn týystaryna da myń alǵys. Sebebi, olar baýyrynan aıryla otyryp, onyń júregin basqa adamǵa berip otyr. Bizge donordyń kim ekeni týraly aqparat aıtylmaıdy. Biletinim er adam. Ota jasaǵannan keıin 1 aıdaı aýrýhanada em aldym, odan ári úı jaǵdaıyndaǵy kútimge kóshtim. Jylyna 2 ret kardıohırýrgııa ortalyǵyna baryp tekserýden ótip turamyn. Medıtsınalyq taldaý nátıjesi alynady, sonymen qatar ómir boıy ishýim kerek arnaıy dári-dármek bar. Barlyq em, ota jáne dári-dármek tegin beriledi», - deıdi ol.
Odan bólek, astanalyq kelinshek júregin aýystyrǵannan keıin ómirge degen kózqarasy ózgergenin jetkizdi.
«Júrek almastyrýdy bir ólip, tirilý der edim. Ómirge degen kózqarasyń ózgeredi, óz basym ómirdiń ár mınýtyn baǵalaımyn. Mundaı jaǵdaıdan keıin ár ýaqytty baǵalaıtyn bolasyń. Eger meniń júregim basqa bireýge jarap jatsa, óz júregimdi transplantatsııaǵa ruqsatymdy beremin. Sebebi, óz basymnan ótkennen keıin, júrek donory bolýdy jaqsy túsinemin. Meniń jaǵdaıymnan keıin jaqyndarym da júrek aýystyrý protsesiniń qanshalyqty mańyzdy ári kúrdeli másele ekenin túsinip jatyr», - dedi G. Smaılova.
Buǵan deıin habarlaǵanymyzdaı, elimizde jyl saıyn 150 adamǵa júrek transplantatsııasy qajet.
