Jumysyn toqtatqan «Qazaq Banki»-niń klıenti 13 mln teńgesin áli alyp ketpegen
«Qazaq Banki» AQ-ǵa salymshylar men jeke kásipkerlerdiń 18 myń depozıti ornalastyrylǵan bolatyn. Aqshany qaıtarý bastalǵan 2018 jyldyń jeltoqsanynan beri barlyǵy 20,2 mlrd teńge ıelerine berildi. Bul, alǵashqy somanyń 98 paıyzy.
Alaıda, osy ýaqytqa deıin salymshylardyń úshten biri ǵana aqshasyn qaıtarýǵa ótinish bergen. Ótinish bermegenderdiń 80 paıyzynyń depozıtinde 5 myń teńgeden kóp bolmaǵan. Al 14 paıyzynyń salymy 100 000 teńgeden asqan. Búginde ótinish bermegenderdiń arasynda depozıttegi eń iri soma 13 mln teńge bolyp otyr.
Semeı, Petropavl, Óskemen qalasynyń salymshylary aqshasyn suraýǵa asyǵar emes.
«Bank VTB (Qazaqstan)» AQ EU bank-agenti ótemaqyny salymshynyń jeke basyn kýálandyratyn qujat pen ótinish negizinde tóleıdi. Onyń blankisin bólimshede alýǵa jáne toltyrýǵa bolady. Ótemaqyny senimhat boıynsha da tóleý múmkindigi bar. Aqsha qolma-qol, bank shotyna aýdarý arqyly tólenedi; bank-agentte tólem somasyna depozıt ashýǵa bolady. Tólem 5 jumys kúni ishinde jasalady. Degenmen, salymshylardyń shamamen 90% tólemdi júgingen kúni aldy.
Sheteldik valıýtadaǵy depozıtter boıynsha ótemaqy teńgemen qaıtarylady. Esepteý úshin 2019 jyldyń 12 jeltoqsanyndaǵy valıýta baǵamy qoldanylady.
Bir salymshynyń «Qazaq Banki» AQ-ta bir ýaqytta teńgede jáne sheteldik valıýtada ornalastyrylǵan depozıtteri boıynsha 15 mıllıon teńgege deıingi jıyntyq ótemaqy tólenedi. Bul jaǵdaıda, sheteldik valıýtadaǵy depozıt boıynsha 5 mıllıon teńge balamasynan aspaıtyn ótemaqy tólenedi.
Byltyr 7 tamyzda «Qazaq Banki» AQ lıtsenzııasynan aırylǵan bolatyn.
24 qazanda sot «Qazaq Banki» AQ májbúrli túrde taratý týraly sheshim shyǵardy.
12 jeltoqsanda bul úkim zańdy kúshine endi.
