Jumysyn áli bastamaǵan kásiporyndaǵy jalaqy qalaı tólenedi - vıtse-mınıstr túsindirdi

NUR-SULTAN. QazAqparat - QR Eńbek jáne halyqty áleýmettik qorǵaý vıtse-mınıstri Aqmádı Sarbasov karantınge baılanysty jumysy áli bastalmaǵan kásiporyndarda qyzmetkerlerge jalaqysy tóleý máselesin sheshý joldaryn atady, dep habarlaıdy QazAqparat tilshisi.

Onyń atap ótýinshe, karantındik sharalar jaǵdaıynda jumysyn qaıta bastaýyna ruqsat etilmegen kásiporyn qyzmetkerlerine qatysty, sonyń ishinde olarǵa eńbekaqy tóleýge qatysty máseleler týyndaǵan. Osyǵan baılanysty qoldanystaǵy eńbek zańnamasynda óndiristik jumysyna tolyqqandy shekteýler bolǵan jaǵdaıda, eńbek qatynastaryn resimdeýdiń birneshe nusqalary qarastyrylǵan.

Birinshi - qashyqtan jumys isteý tártibi. Qashyqtaǵy jumys sharttary eńbek shartyna qosymsha kelisimderde belgilenedi. Al jumys berýshi qyzmetkerdi qajetti baılanys quraldarymen qamtamasyz etýi kerek.

Ekinshi - tolyq emes jumys kúni. Jumys berýshi tolyq emes jumys kúnin (kúndelikti jumys (jumys aýysymy) uzaqtyǵynyń normasyn azaıtý, tolyq emes jumys aptasy ne osy eki nusqada) belgileýge quqyly.

Úshinshisi - aqysy tólenbeıtin demalys. Oǵan qyzmetkerdiń bastamasy boıynsha jáne jumys berýshiniń kelisimimen ǵana ruqsat etiledi.

Tórtinshi - jumys berýshi men qyzmetkerdiń baqylaýyna jatpaıtyn jaǵdaılarǵa baılanysty toqtap turýdy resimdeý. Toqtap turý 1 eń tómengi jalaqydan, ıaǵnı 42 500 teńgeden kem bolmaıtyn mólsherde tólenýi kerek.

«Biz shekteýlerdiń bar ekenin túsinemiz, bıznes tolyq kólemde óndiristik qyzmetin júzege asyra almaı jatyr. Sondyqtan, osy múmkindikti paıdalana otyryp, barlyq adal jumys berýshilerge belsendi azamattyq ustanymy, qyzmetkerleri úshin áleýmettik jaýapkershiligi men jumys oryndaryn saqtap otyrǵan úshin alǵys aıtqym keledi», – dedi Aqmádı Sarbasov Ortalyq kommýnıkatsııalar qyzmetindegi brıfıng barysynda.

Foto: inbusiness.kz