Jumyssyz jastardy kásibı bilimmen qamtý máselesin jan-jaqty pysyqtaý qajet – Eraly Toǵjanov

NUR-SULTAN. QazAqparat – Jumyssyz jastardy kásibı bilimmen qamtý máselesin jan-jaqty pysyqtaý qajet. Bul týraly búgin Úkimet otyrysynda QR Premer-Mınıstriniń orynbasary Eraly Toǵjanov aıtty, dep habarlaıdy QazAqparat tilshisi.

«Josparlanǵan is-sharalar bilim berý júıesin jańa deńgeıge kóterip, básekege qabilettiligin arttyrýǵa baǵyttalǵan. Birneshe baǵytqa nazar aýdarǵym keledi. Birinshiden, 2-6 jastaǵy balalardy mektepke deıingi bilim berýmen qamtýdy 2025 jylǵa deıin 95 paıyzǵa jetkizýdi qamtamasyz etý mindeti tur. Ol tolyqtaı oryndalady. Ekinshiden, ákimdikter bıyl salynýy tıis 200 jańa mektep qurylysyna, jańǵyrtylýy qajetti 1 015 mektepke turaqty monıtorıng júrgizý jáne onyń oryndalýy týraly aı saıyn aqparat berip otyrǵany durys», - dedi Úkimet basshysynyń orynbasary.

Úshinshiden, ol orta bilim berýge baılanysty aýyl men qaladaǵy bilim sapasyn teńestirý máselesi kún tártibinde turǵanyn basa aıtty. Sondyqtan ákimder osy baǵytty erekshe baqylaýǵa alýy qajettigin eskertti.

«Tórtinshiden, óńirlerde bıyl engizilgen qosymsha bilim berý memlekettik tapsyrysyn iske asyrýǵa jan-jaqty daıyndyq júrgizilýi tıis. Ashyǵyn aıtqanda bul jańalyqty kópshilik kútip otyr. Sondyqtan qajetti qarjy bólinip, tıisti uıymdastyrý jumysy iske asyrylýy kerek. Besinshiden, bilim mınıstrligi ákimdiktermen birge tegin kásibı-tehnıkalyq bilim berý aıasynda jumyssyz jastardy kóbirek kásibı bilimmen qamtý máselesin de jan-jaqty pysyqtaýy qajet», - dedi Eraly Toǵjanov.