Jumysshy mamandyǵyn alyp jatqan stýdentterdiń shákirtaqysy ósedi

NUR-SULTAN. QazAqparat - Jumysshy mamandyǵyn alyp jatqan stýdentterdiń shákirtaqysy artady. Bul týraly búgin Aqordada BAQ ókilderine QR Prezıdentiniń syılyqtary men granttaryn tabystaý rásiminde Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«1 qyrkúıekten 122,5 myń adamdy qamtıtyn tehnıkalyq jáne kásiptik bilimniń jumysshy mamandyǵy boıynsha oqyp jatqan stýdentterdiń shákirtaqysy 30 paıyzǵa artatyn bolady. Joǵaryda atalǵan qaýyrt sharalar bizdiń bárimizdi tolǵandyryp otyrǵan áleýmettik máselelerdi sheshýge septigin tıgizerine senim bildiremin. Árıne, munyń barlyǵy Elbasynyń tanymal strategııasynda belgilegen maqsattarǵa qol jetkizýge oń áserin tıgizetin bolady», - dedi Qazaqstan Prezıdenti.

Memleket basshysy elimizdiń ekonomıkasynyń aldynda óte kúrdeli tegeýirinderdiń turǵandyǵyna qaramastan osynaı sharalar qabyldanyp otyrǵandyǵyn basa aıtty.

«Olar negizinen syrtqy áserlerden týyndap jatyr. Saýda soǵystary men sanktsııalyq teketires jalǵasýda. Tolyqtaı alǵanda álemdegi geosaıası ahýal kúrdeli», - dedi Qasym-Jomart Toqaev.