Jumysqa qabyldaımyn: SQO-da ınternet-alaıaqtar qalaı áreket etedi
SQO Polıtsııa departamenti baspasóz qyzmetiniń málimetinshe, Krımınaldyq polıtsııa basqarmasynyń qyzmetkerleri uqsas, biraq arasyna úsh aı salynyp jasalǵan eki ınternet-alaıaqtyqty ashty.
Qańtar aıynyń sońynda tártip saqshylaryna Petropavldyń 39 jastaǵy turǵyny habarlasyp, «OLX» saıty arqyly jumys izdeý kezinde bireýlerdiń ony aldap, segiz myń teńgesin ıelengenin aıtqan. Habarlandyrýdy ornalastyrǵan soń, onyń telefon nómirine er adam qońyraý shalyp, jeke júrgizýshisi bolyp jumysqa ornalasýyn usynǵan. Al medıtsınalyq tekseristen ótkeni týraly anyqtamany jedel túrde alýǵa kómestespek bolǵan, ol úshin telefonǵa 8 myń teńgeni laqtyrýdy suraǵan. Qala turǵyny aqshany salǵannan keıin «jumys berýshige» habarlasady. Alaıda onyń telefon nómiri sóndirýli bolǵan.
Dál osyndaı ınternet-alaıaqtyq mamyr aıynyń basynda tirkeldi. «Market» saıty arqyly jumys izdegen 57 jastaǵy petropavldyqqa bireýler «Gazel» avtokóligine júrgizýshi bolýdy usynǵan. Jedeldetilgen túrde medıtsınalyq anyqtama alý úshin 10 myń teńge suraǵan. Bul joly da er adam aqsha salǵannan keıin «jumys berýshi» telefonyn sóndirip tastaǵan.
Jedel-izdestirý is-sharalaryn júrgizý barysynda Krımınaldyq polıtsııa basqarmasynyń qyzmetkerleri ınternet-alaıaqtyq jasaǵan kúdiktilerdi anyqtady. Olar birin-biri tanymaıtyn Pavlodar oblysynyń eki turǵyny bolyp shyqty. Qazirgi ýaqytta osy derekter boıynsha sotqa deıingi tergeý júrgizilip jatyr.
SQO Polıtsııa departamenti bastyǵynyń orynbasary Rýslan Nazarovtyń aıtýynsha, jyl basynan beri oblys aýmaǵynda 153 ınternet-alaıaqtyq faktisi tirkelgen.
«Jurttyń aqshasyn ıemdený úshin alaıaqtar túrli tásil men stsenarıılerdi qoldanady. Biz turǵyndardan qandaı da bir qarjylyq operatsııalar jasaǵan kezde asyǵys sheshim qabyldamaýdy, ınternet-bankıngti qoldanbas buryn muqııat tekserýdi suraımyz. Qandaı jaǵdaı bolmasyn eshkimge ózderińizdiń jeke derekterińizdi: PIN-kodtardy, parolderdi, logınderdi bermeý kerek. Taýar satyp alǵan kezde ınternet-satýshylardan beınesholý jasaýdy surap, basqalardyń jazǵan pikirlerin muqııat oqyp shyǵýlaryńyzdy suraımyz», - deıdi Rýslan Nazarov.
