Jumyssyzdyqtyń eń tómen deńgeıi - Qaraǵandy oblysynda
Qaraǵandy oblysynda jumyssyzdyq deńgeıi 4,1%-ǵa deıin tómendedi, bul - respýblıkadaǵy eń tómengi kórsetkish. Bul týraly Qaraǵandy oblysynyń ákimi Ermaǵanbet Bólekpaev ortalyq kommýnıkatsııalar qyzmetinde aıtty, dep habarlaıdy Kazinform agenttigi.
Ákimdiktiń málimetinshe, oblysta ulttyq jobalardy, baǵdarlamalardy jáne jeke bastamalardy iske asyrý qorytyndysy boıynsha 43 myń jańa jumys orny ashylǵan jáne 11 myńnan astam jastar jumysqa ornalasqan.
«Aýyl amanaty» jobasy esebinen 2,9 mlrd teńgege 396 bıznes-joba maquldandy, onyń ishinde 2 mlrd 481 mln teńgege 326 kredıt berildi, 371 jumys orny quryldy. Osy sharalardyń barlyǵy bizge jumyssyzdyq deńgeıin 4,1%-ǵa deıin tómendetýge múmkindik berdi, bul respýblıkadaǵy eń tómengi kórsetkish», - dedi Ermaǵanbet Bólekpaev.
Onyń aıtýynsha, shaǵyn jáne orta bıznes sýbektileriniń sany 12,2% ósti – bul 100 myńnan astam jańa salyq tóleýshiler.
Belsendi halyqtyń jartysy, oblystyń árbir ekinshi turǵyny shaǵyn jáne orta bıznespen shuǵyldanady.
«242,3 myń adam nemese ekonomıkalyq belsendi halyqtyń 43% shaǵyn jáne orta bıznespen qamtylǵan. ShOB ónimin shyǵarý 1,2 trln teńgege jetti. Biz bıznes-klımatty jaqsartý boıynsha jumys istep jatyrmyz, bul bizge bıznes júrgizý jeńildigi boıynsha el reıtınginde ekinshi oryn alýǵa múmkindik berdi. Respýblıkada birinshi bolyp bólshek salyq mólsherlemesin eki ese tómendettik (4-ten 2%-ǵa deıin). Bul sharany 900-den astam kásipker paıdalandy jáne atalǵan ózgerister engen sátten bastap salyq tóleýshiler sanyn 6 esege arttyrdy», - dep atap ótti ákim.
