Jumysshy mamandyqtar jyly: Qazaqmys stýdentteri zamandastaryn metallýrg bolýǵa shaqyrady
ASTANA. KAZINFORM – «Qazaqmys» kompanııalar tobynyń Polıtehnıkalyq kolledji jumysshy mamandyqtardyń sapasyn arttyrý isine úzdiksiz úles qosyp keledi. Astanadaǵy «Jumysshy mamandyqtar qalasy» festıvaline qatysýshylar osyǵan kóz jetkizdi.
Eldiń mys óndirisindegi júıe quraýshy kásiporyndardyń biri bolyp esepteletin «Qazaqmys» kompanııalar toby 38 myńǵa jýyq adamdy jumyspen qamtyp otyr. Korporatsııa katodty mystan bólek quıma altyn men kúmis, kúkirt qyshqylyn, selen men mys tellýrıdin, qorǵasyn tozańyn óndiredi. Katodty mys óndirýden álemde 12 orynda turǵan kásiporyn úshin basty qundylyq – adamdar. Sondyqtan ózine qajetti mamandardy daıyndaýǵa tyńǵylyqty kóńil bóledi. Kásiporynǵa tıesili Polıtehnıkalyq kolledj osy maqsattyń údesinen shyǵyp keledi.
Astanada ótip jatqan «Jumysshy mamandyqtar qalasy» festıvalinde osy kolledjde bilim alyp júrgen bolashaq metallýrgter kópshilikke óz kásibiniń qyr-syryn baıandap, qabiletterin ispen pash etti.
Jalpy korporatsııanyń óndiris oshaqtary Qaraǵandy, Jezqazǵan, Balqash qalalarynyń tóńireginde shoǵyrlanǵan. «Qazaqmys» korporatsııasy polıtehnıkalyq kolledjiniń 4 kýrs stýdenti Dýman Jetkin osy Balqash qalasynda týǵan.
- Birinshi ken orny burǵylanyp, barlaý jumystary júrgiziledi. Odan keıin karerler, kenishter ashylady. Kenishten qazyp alynǵan materıal baıytý fabrıkasyna jiberiledi. Bizge sol fabrıkadan retinde keledi. Odan keıin bir peshten ekinshi peshke balqytyp, bir kontsentrattyń ózinen kóptegen metall alyp shyǵamyz, - deıdi ol.
Atalǵan kolledjdiń taǵy bir 4 kýrs stýdenti Dilnaz Musahanova bul salaǵa ata-anasynyń keńesi boıynsha bet burǵan eken. Áýel basta sáýletshi bolýdy armandaǵan bolashaq maman qazirgi sheshimine ókinbeıtinin aıtty. Jalt-jult etken ken álemi qyz janyn birden ózine elitip áketse kerek.
- Metalldar jyltyrap, ádemi bop turady. Altyn, kúmis barlyǵy ádemi kórinedi. Metallýrgııa mamany óte qyzyqty. Qazaqstannyń paıdaly qazbalary óte kóp qoı, - deıdi stýdent.
Jasandy ıntellekt salasyndaǵy báseke qyzyp, ónerkásip revolıýtsııasynyń besinshi kezeńi (Indýstrııa 5.0) jaqyndaǵan saıyn metallýrgııa salasy da tehnologııanyń kóshine saı túrlenip keledi. Sondyqtan ken ıgerý salasyndaǵy jumysshy mamandyqtar árqashan suranys joǵary, tabysy mardymdy kásiptiń bir bolyp qala beretin túri bar. Zamannyń betalysyn qalt jibermeı baǵyp otyrǵan jastar muny jaqsy túsinedi. Sondyqtan da «Qazaqmys» usynǵan múmkindikti utymdy paıdalanyp, kásiporyn janyndaǵy kolledjde bilim alyp jatyr. Bul kolledjge Qazaqstannyń túkpir-túkpirinen talapkerler kelip, oqýǵa qujat tapsyratynyn eskersek, jastardyń jumysshy mamandyǵyna, sonyń ishinde metallýrg mamandyǵyna degen kózqarasy jaqsy.
Eske salsaq, qańtar aıynda «Qazaqmys» tehnıkalyq selenniń alǵashqy 100 tonnasyn jóneltken bolatyn.
«Qazaqmys» korporatsııasy 2025 jylǵy qańtardan bastap kásiporyn ujymdarynda jalaqynyń Ulttyq statıstıka bıýrosy resmı belgilegen ınflıatsııa deńgeıinde ındeksteletinin habarlaǵan edi. Qazir munda ortasha aılyq 800 myń teńgeden asady.
Sondaı-aq, kásiporynda 2025 jyldan bastap 2025-2029 jyldarǵa arnalǵan jańa Ujymdyq shart kúshine endi. Shart aıasynda:
- materıaldyq kómek pen ótemaqy mólsherin ulǵaıtý;
- damý erekshelikteri bar balalardyń ata-analaryna qosymsha jeńildikter;
- balalar demalysy baǵdarlamalaryn keńeıtý;
- barlyq qyzmetkerdi erikti medıtsınalyq saqtandyrýmen qamtý kózdelgen.