Jumysshy mamandyqtar jyly: Astanada jastardyń jumysqa ornalasýyna qandaı kómek kórsetiledi

ASTANA. KAZINFORM — Astana qalasy ákimdiginiń «Eńbek mobıldiligi ortalyǵynyń» dırektory Oljas Omar jumyssyz azamattarǵa, joǵary oqý oryndarynyń túlekterine jáne jumys berýshilerge jańa múmkindikter men qoldaý sharalary týraly aıtty, dep habarlaıdy elorda ákimdiginiń resmı saıty.

Spıkerdiń aıtýynsha, Jumysshy mamandyqtar jyly aıasynda jastarǵa kásibı baǵdar berý jáne jumys berýshilerdiń kadr daıarlaý úderisine belsendi qatysýy basty nazarǵa alyndy. Osy maqsatta 9 jáne 11-synyp túlekterine kásibı keńes berilip, suranysqa ıe mamandyqtardy tańdaýǵa kómek kórsetilip jatyr.

«Óndiris salasynda jumys isteıtin mamandardy qoldaý sharalary da qolǵa alynǵan. Kolledjderde «Quzyretterdi damytý fabrıkasy» formatynda resýrstyq ortalyqtar ashylyp, «Jumys berýshi kúni» jobasy iske qosyldy. Sondaı-aq, bos jumys oryndar jármeńkeleri uıymdastyryldy. Bıyl Astanada memlekettik baǵdarlama aıasynda 20 myńnan astam adam qamtylady, onyń ishinde 12 myńy – jastar.

IT salasyndaǵy kásibı biliktilikti tegin rastaý. Qazirgi tańda tsıfrlyq ekonomıkanyń qarqyndy damýyna baılanysty aqparattyq tehnologııalar salasynda jumys isteýge nıetti mamandardyń sany artyp keledi. Osyǵan oraı, Career Enbek platformasy arqyly kásibı biliktilikti tegin rastaýǵa múmkindik beretin vaýcher alý júıesi iske qosyldy. Bul baǵdarlama aıasynda jeli ákimshisi, júıelik analıtık, aqparattyq qaýipsizdik ınjeneri jáne basqa da suranysqa ıe IT mamandyqtary boıynsha sertıfıkat alýǵa bolady», - deıdi Oljas Omar.

Baǵdarlama qalaı jumys isteıdi?

1. Eńbek mobıldiligi ortalyǵy mamandyq tańdaýǵa keńes beredi.

2. Ótinish Career Enbek platformasy arqyly ETsQ kómegimen beriledi.

3. Ótinish maquldanǵannan keıin vaýcher jeke kabınette qoljetimdi bolady. 

4. Úmitker emtıhan tapsyryp, kásibı biliktiligin rastaıtyn sertıfıkat alady.

«Qazaqstanda kolledjder men joǵary oqý oryndarynyń túlekterine arnalǵan jastar praktıkasy baǵdarlamasy júzege asyp jatyr. Bul baǵdarlama jas mamandardyń alǵashqy jumys tájirıbesin alýyna múmkindik beredi. Baǵdarlama sharttaryna sáıkes, jastar praktıkasynyń uzaqtyǵy 12 aıǵa deıin, jalaqy mólsheri 117 960 teńgeni quraıdy, al qatysýshylardyń jasy 35-ten aspaýy tıis. Ótken jyldyń qorytyndysy boıynsha 567 jumys berýshi 3 353 jumys ornyna ótinish berdi, qazirgi ýaqytta túlekter úshin 3 319 bos jumys orny bar.

Sonymen qatar, endi stýdentter úshin tájirıbe men taǵylymdamadan ótý protsesi jeńil ári qoljetimdi bola tústi. Enbek.kz portaly jumys berýshilerge stýdentter men taǵylymdamadan ótýshilerdi ońaı tabýǵa múmkindik beredi. Ol úshin aldymen Enbek.kz saıtyna tirkelip, «Kásibı tájirıbe» belgisi bar bos jumys ornyn jarııalaý qajet. Odan keıin jumys berýshi stýdentterdi tańdap, olardy suhbattasýǵa shaqyra alady. Kelesi kezeńde oqý mekemesimen onlaın kelisimshart jasalyp, stýdent taǵylymdamadan ótedi. Jumys berýshi taǵylymdamashynyń elektrondy kúndeligin júrgizip, onyń nátıjelerin qadaǵalap otyrady. Bul júıe stýdentterge alǵashqy jumys tájirıbesin alýǵa, al jumys berýshilerge bolashaq mamandardy daıarlaýǵa múmkindik beredi», - deıdi «Eńbek mobıldiligi ortalyǵynyń» dırektory.

Budan bólek, memleket jumys berýshilerdiń suranysyna sáıkes jumyssyz azamattardy tegin kásiptik oqytý baǵdarlamasyn usynady. Baǵdarlama aıasynda oqý merzimi 1 aıdan 6 aıǵa deıin jalǵasady. Oqıtyn azamattarǵa 43 574 teńge stıpendııa jáne 7 864 teńge kóleminde materıaldyq kómek beriledi.

Oqytý jumyssyz azamat, jumys berýshi, oqý orny jáne Eńbek mobıldiligi ortalyǵy arasynda jasalatyn tórtjaqty kelisimshart negizinde júzege asyrylady. Baǵdarlamaǵa turaqty salyq tóleýshi, jalaqy boıynsha qaryzy joq jáne keminde 1 jyl boıy jumys istep kele jatqan kásiporyndar qatysa alady. Ótinimder Enbek.kz portalyndaǵy «Kásiptik oqytý» bóliminde qabyldanady.

Buǵan deıin suranysqa ıe kadr daıarlaýǵa ne kedergi ekenin jazǵanbyz.