Jumysshy mamandyq. Qyzylordalyq avtobýs júrgizýshisiniń bir kúni qalaı ótedi
QYZYLORDA. KAZINFORM — Qyzylorda qalasynyń ishindegi avtobýs júrgizýshileriniń jumysy qarbalasqa toly.
Osy oraıda 2025 — jumysshy mamandyqtar jyly qarsańynda «Qyzylorda avtbýs parki» JShS-de № 31 baǵdarly avtobýs tizginin ustaǵan Samat Aqjarqynovtyń eńbek yrǵaǵyna kóz salyp kórdik.
Qandaı talaptar qoıylady?
«Qyzylorda avtbýs parki» JShS-de 700-den astam adam eńbek etse, olardyń 490-y avtobýs júrgizýshisi. Avtobýs júrgizýshisine qoıylatyn basty talap — «D» kategorııasy boıynsha bes jyl eńbek ótiliniń bolýy.
— Bizge kelgen kólik júrgizýshilerin arnaıy synaqtan ótkizemiz. Synaq merzimi 2-3 aıǵa deıin sozylady. Odan súrinbeı ótken kólik júrgizýshilerine arnaıy avtobýs baǵdary bekitiledi. Árıne, olarǵa qoıylatyn talap úlken. Kólikti saýatty júrgizýmen birge jolaýshylarmen qarym-qatynas jasaý barysynda etıka talaptaryn saqtaýǵa nazar aýdarylady. Avtobýstyń barlyǵy arnaıy kameramen jabdyqtalǵan. Jolaqyny tóleýge arnalǵan arnaıy qurylǵy ornatylǵan. Bizde jolaqyny elektrondy túrde tóleý — 85 teńge bolyp bekitilse, jolaýshy qolma-qol aqshamen 130 teńge shyǵyndaýǵa májbúr, — dedi seriktestik dırektory Ábdibákir Mashtaev.
Qurylǵyǵa qazaqstandyq segiz bankisiniń kartochkasy jáne qosymshalary arqyly jolaqyny tóleýge bolady.
Jolaýshyǵa qyzmet — jaýapty mindet
Qyzylorda qalasynyń irgesinde ornalasqan Tasbóget kentinde turatyn Samat Aqjarqynov bıyl otyz tórt jasqa toldy. Eki jyl buryn «Qyzylorda avtobýs» parkine jumysqa kelgen edi. Odan buryn Atyraý oblysyndaǵy «Teńizshevroıl» munaı kompanııasynda júrgizýshi bolyp eńbek etken. Ol jaqta bir aı jumys jasap, bir aı demalǵan eken. Eki jyldaı buryn qysqartýǵa iligip, kóp oılanbastan jergilikti avtobýs parkine qujatyn ótkizgen edi. Sodan beri atalǵan mekemede nápaqasyn aıyryp keledi.
— Munda jumys eki kún bolsa, eki kún demalýǵa múmkindik bar. Árıne, bizde jumys kúni erte bastalady. Úıden tańǵy beste shyǵamyz. Avtobýsty jolǵa daıyndaısyń. Eń aldymen dıspetcherge kýáligimizdi kórsetip, jol paraǵyn alǵannan keıin medıtsınalyq baqylaýdan ótemiz. Dárigerler júrgizýshilerdiń qan qysymyn ólsheıdi. Sondaı-aq ishimdik ishpegenińdi anyqtaıdy. Kelesi kezekte mehanık mamandary avtobýstyń tehnıkalyq jaǵdaıyna nazar aýdarady. Júrýge jaramdylyǵy anyqtalǵannan keıin avtobýstyń tazalyǵyna mán beriledi, — dedi Samat bizben áńgimesinde.
Samat júrgizetin № 31 baǵdarly avtobýs «Araı-3» móltek aýdany men Talsýat eldi mekeni aralyǵynda qatynaıdy. Eki aralyqta bir saǵattan astam ýaqyt ketedi. Tańǵy saǵat 6.45-te Samat «Araı-3» aýmaǵynan jolǵa shyqty. Bul móltek aýdan on jyldaı buryn boı kótergen. Turǵyndardyń barlyǵy kóp qabatty úıde turady. Olardyń basym kópshiligi qalanyń ortalyq bóligindegi túrli mekemede qyzmet atqarady. Oǵan qosa balalar tańerteńgi sabaǵyna barý úshin avtobýsqa minedi.
Tańǵy ýaqyt bolǵannan keıin jolaýshylar sany kóp emes. Dese de árbir aıaldama saıyn adam qarasy arta tústi. Avtobýs N.Nazarbaev dańǵylynyń boıynda № 3 emhana, oblystyq medıtsına ortalyǵy, Qorqyt ata ýnıversıtetiniń № 5 korpýsy, salyq komıteti, «Sáýlet» shaǵyn aýdandary boıyndaǵy joldan ótti. Osylaısha avtobýs qalanyń ortalyq bóligine jaqyndaı tústi.
— Ras, burynǵy jyldary qalada avtobýs problemasy ózekti edi. Bul qyzmetti negizinen jekelegen azamattar atqardy. Búginde qalanyń qaı bóligine de barlyq talapqa saı keletin avtobýstar alyp barady. Bizdiń avtobýstarda barlyq jaǵdaı jasalǵan. Alǵashqyda jolaýshylar qolma-qol tóleýge áýes edi. Qazir bári uıaly baılanys qosymshasy arqyly elektrondy túrde tóleýdi meńgerip aldy. Sondaı-aq buryn jolaýshylar joldyń kez-kelgen bóliginde avtobýstardy toqtatyp minip ketetin edi. Ol jol qaýipsizdigine de keri áserin tıgizetin. Al bizdiń avtobýstar tek aıaldamaǵa toqtaıdy. Kópshilik ol talapqa da boı úıretti, — deıdi Samat óziniń jumysy jaıynda.
Turǵyndar tártipke boı úıretti
Biz bul ýaqytta «Avtobasqarma», «Ýnıversam», «Bolashaq ýnıversıteti», «Dostyq úıi», qalalyq ákimshilik, ýnıversıtet, № 1 emhana, Іshki ister departamenti, Aıtbaı meshiti, «Jaına» bazary aıaldamalarynan ótip, eski bazar aýmaǵyna jetip qalǵan edik. Qalanyń atalǵan bólikteri — halyq jıi qonystanǵan aımaqtar. Sondyqtan avtobýs ishindegi jolaýshylar sany arta tústi. Bul aýmaqtarda jolaýshylar aıaldamadan jıi túsip, minip jatty.
Al Eski bazardan keıin avtobýs Jýrba kóshesine burylyp, odan ári Súleımen Esqaraev kóshesi, «Syrdarııa» saýda úıi arqyly emhana, shaǵyn bazar, Maral ıshan kóshesi, № 6 jylý-elektr ortalyǵy, TsKZ arqyly júrdi. Al Sarysý kóshesinen keıin Talsýat eldi mekenine jetti. Bul ýaqytta saǵat tili 8.00-de kórsetip turdy.
Baıqaǵanymyz, jol boıynda jolaýshylar da barlyq tártipti saqtap, jolaqysyn ýaqytyly tólep jatty. Kólik júrgizýshisi de kólikti jaıly júrgizýge mán berdi.
— Bizge úlken jaýapkershilik júktelgenin bilemiz. Qanshama adam bolsa, sonsha taǵdyr bar. Olardyń baratyn jerine aman-saý jetýine biz jaýaptymyz. Ras, ómir bolǵannan keıin túrli minezdi adamdy kóresiń. Keıbiri úıinen áldenege ashýlanyp shyǵady. Kóńil-kúıi bolmaı otyrǵanyn baıqaısyń. Tipti, avtobýsta qasynda otyrǵan jolaýshymen sózge kelip jatady. Bul ýaqytta barynsha sabyrǵa keltirip, mejeli jerine jetkenge deıin tártipti saqtaýǵa shaqyrýǵa týra keledi, — deıdi Samat.
Talsýat — Qyzylorda qalasynyń irgesinde jatqan eldi meken. Kezinde Syrdarııa aýdanyna qaraǵan aýylda qazir 1000-ǵa tarta adam turady. Olardyń kópshiligi oblys ortalyǵyna qatynap jumys jasaıdy. Sondaı-aq bazarǵa jáne ózge de sharýamen kelip-ketetin azamattar az emes.
Samat mejeli jerine jetti. Osylaısha ózi jumysqa túsken kúni 6-7 aınalym jasaıdy. Keri baǵytta da avtobýs sol jolmen qatynaıdy. Táýligine 600-700 adamǵa deıin minedi.
Biz avtobýs júrgizýshisiniń kúndelikti jumys yrǵaǵyna kóz salyp kórdik. Jolaýshylar tasymaly úlken jaýapkershilikti qajet etedi. Jumys barysynda óz mindetin joǵary deńgeıde atqarýǵa mán berip júrgen Samat sekildi mamandardyń az emes ekenin baıqadyq. Táýlik boıyna halyqqa qaltqysyz qyzmet jasaý — abyroıly mindet sanaıtyn eńbek adamdary laıyqty baǵalaýǵa turarlyq.
Eske salsaq, budan buryn «Óskemen Vodokanal» kommýnaldyq kásipornynda júrgizýshi bolyp jumys istep kele jatqan Qanat Beksultanovtyń jumys barysy jaıynda áńgimelegen edik.