Qazaqstan men Shveıtsarııa arasyndaǵy taýar aınalymy 1,1 mlrd dollar boldy
ASTANA. KAZINFORM – Búgin Astanada vıtse-premer — ulttyq ekonomıka mınıstri Serik Jumanǵarın Qazaqstan-Shveıtsarııa iskerlik keńesiniń V otyrysyn ashty. Bul týraly Ekonomıka mınıstrliginiń baspasóz qyzmeti habarlady.
Óz sózinde ol Shveıtsarııa Qazaqstan ekonomıkasyndaǵy jetekshi ınvestordyń biri bolyp qala beretinin atap ótti. Shveıtsarııalyq kompanııalar energetıka, mashına jasaý, tamaq jáne farmatsevtıka ónerkásibinde, birqatar tehnologııalyq salada jumys isteıdi.
— 2025 jyldyń toǵyz aıynyń qorytyndysy boıynsha eki el arasyndaǵy taýar aınalymy shamamen $1,1 mlrd boldy. Qazaqstan mashına jasaý, farmatsevtıka, medıtsına jáne bıotehnologııa, tsıfrlandyrý, kólik-logıstıkalyq ınfraqurylym men jańartylatyn energııa kózderi salalarynda shveıtsarııalyq bıznestiń qatysýyn arttyrýǵa nıetti, — delingen mınıstrlik habarlamasynda.
Vıtse-premer Qazaqstannyń ınvestorlarǵa barynsha qolaıly jaǵdaı jasaýǵa daıyn ekenin atap ótti.
— Eki el yntymaqtastyǵyndaǵy mańyzdy jobanyń biri — Astanadaǵy «Shtadler Qazaqstan» kompanııasynyń bazasynda jolaýshylar vagony óndirisin lokalızatsııalaý. Búginde 557 joǵary tehnologııalyq vagon jetkizýge kelisimshart jasaldy. Onyń alǵashqy toby jyl sońyna deıin jetkiziledi, — delingen habarlamada.
Serik Jumanǵarın Qazaqstan Shveıtsarııanyń, sonyń ishinde Lýgano qalasynyń, tsıfrlyq valıýtany damytýdaǵy jáne blokcheın tehnologııasyn qoldanýdaǵy tájirıbesine qyzyǵýshylyq tanytatynyn bólek atap ótti.
— Qazaqstan — búginde ónerkásiptik klaster qalyptastyrýǵa daıyn alań. Biz konsortsıýmdar qurýǵa, tehnologııalyq kooperatsııany damytýǵa daıynbyz, — dedi vıtse-premer.
Otyrys sońynda qatysýshylar yntymaqtastyqty damytýǵa jáne ózara is-qımyldyń ártúrli salasynda ekijaqty saýda-ekonomıkalyq qatynasty nyǵaıtýǵa baǵyttalǵan birqatar qujat pen kelisimge qol qoıdy.
Qazaqstan-Shveıtsarııa iskerlik keńesi eki eldiń isker toptary arasyndaǵy yntymaqtastyqty damytý úshin 2012 jyly qurylǵan úılestirý jáne konsýltatsııalyq organ.
QShІK-niń negizgi mindetteri:
saýda-ınvestıtsııalyq ózara is-qımyldy nyǵaıtý;
Qazaqstan men Shveıtsarııa bıznesi arasyndaǵy tikeleı baılanys pen aqparat almasýdy qoldaý;
saýda-ekonomıkalyq yntymaqtastyqtaǵy kedergilerdi joıý;
bıznes júrgizý jaǵdaıyn jaqsartý boıynsha usynymdar daıyndaý.
Yntymaqtastyqtaǵy basym baǵyttar: energetıka, mashına jasaý, KTO jáne kadrlar daıarlaý, ónerkásiptik jáne turmystyq qaldyqtardy basqarý, farmatsevtıka, temirjol kóligi.
Aıta ketelik Shveıtsarııa Federaldy Keńesiniń vıtse-prezıdenti Gı Parmelan Kazinform agenttigine bergen eksklıýzıvti suhbatynda Qazaqstan qalaısha Bernniń Ortalyq Azııadaǵy basty seriktesine aınalǵanyn atap ótken edi.