Júkti áıelge qandaı medıtsınalyq qyzmetter qoljetimdi
PETROPAVL. KAZINFORM — Júkti áıelderden Mindetti áleýmettik medıtsınalyq saqtandyrý júıesine qatysty suraqtar jıi túsedi. Osyǵan oraı Áleýmettik medıtsınalyq saqtandyrý qorynyń resmı ókili Zabıra Orazalıeva bolashaq analardy jıi mazalaıtyn máselelerge qatysty jaýap berdi.
— Resmı túrde jumys isteıtin áıelge MÁMS-ke jarna tóleý kerek pe? Al jumysy bolmasa she?
— Eger siz resmı túrde jumys isteseńiz, MÁMS-ke jarnalar men aýdarymdardy jumys berýshi tóleıdi. Aı saıyn eńbekaqyńyzdan 2% mólsherinde jarna ustalady. Al, jumys berýshi óz qarajaty esebinen 3% aýdarym jasaıdy. Júktilik boıynsha demalysqa shyqqanǵa deıin bul mindettemeler tolyqtaı jumys berýshi tarapynan saqtalady.
Jumys istemeıtin júkti áıelder — memleket jarna tóleıtin jeńildik sanatyna jatady. Ol úshin ózińiz tirkelgen emhanaǵa baryp, júktilik boıynsha esepke turý qajet. Derekter júıege engizilgennen keıin áıelge «saqtandyrylǵan» mártebesi beriledi. Jarnany ózińiz tóleýdiń qajeti joq.
Taǵy bir eskeretin jaıt, kásipker retinde tirkelip, tabysy bolmasa da, áıel jarna tóleýge mindetti. Eger qyzmet resmı toqtatylmasa, MÁMS-ke jeke kásipker retinde jarna tóleý qajet. Bıylǵy tólem mólsheri — 5 950 teńge. Jeńildik sanatyna ený úshin jeke kásipkerliktiń qyzmetin resmı túrde toqtatý qajet.
Jeńildik sanatyna jumys istemeıtin júkti áıel ǵana kiredi. Júktilik boıynsha esepte turǵan, resmı jumys istemeıtin ári jeke kásipker retinde tirkelmegen áıel.
— Qandaı jaǵdaıda júkti áıel jeńildik mártebesinen aıyrylýy múmkin?
— Júıede mindetti zeınetaqy jarnalary nemese áleýmettik aýdarymdar paıda bolǵan jaǵdaıda jeńildik mártebesi alynyp tastalýy múmkin. Bul — áıeldiń tabys alyp, «jumys istemeıtin» sanatyna sáıkes kelmeıtinin bildiredi.
Mundaı jaǵdaı kóbine júkti áıelderdiń jeke kásipker retinde tirkelip, aýdarymdar jasaýy saldarynan bolady. Mártebeni qalpyna keltirý úshin jeke kásipkerliktiń qyzmetin resmı toqtatý qajet.
Júkti áıelge MÁMS boıynsha saqtandyrý qajet pe?
— Iá. Barlyq júkti áıel MÁMS júıesinde saqtandyrylǵan bolýy tıis. Sebebi, júktilik pen bosanýǵa qatysty medıtsınalyq kómektiń basym bóligi MÁMS aıasynda kórsetiledi. Jumys isteıtin áıelder — jumys berýshiniń aýdarymdary esebinen, jeke kásipkerler — óz jarnalary esebinen, al jumys istemeıtinder — memleket esebinen saqtandyrylady.
— Júkti áıel qashan esepke turýy kerek?
— Áıel turǵylyqty mekenjaıy boıynsha tirkelgen emhanada esepke alynady. Eger buryn basqa emhanada qyzmet alǵan bolsa, qonys aýdarýyna baılanysty jaqyn aımaqtaǵy emhanaǵa tirkelýi qajet. Júktilik boıynsha medıtsınalyq esepke 12 aptaǵa deıin turǵan jón. Esepke alý úshin áıel tirkelgen emhananyń akýsher-gınekologyna júginedi. Ony MÁMS aıasynda qabyldaıdy jáne saqtandyrylǵan mártebesin talap etedi.
Eger áıel saqtandyrylmaǵan bolsa, dáriger jalpy tájirıbe nemese akýsher qabyldaýyna júgine alady. Óıtkeni, bul qyzmetter TMKKK sheńberinde kórsetiledi. Esepke turǵannan keıin jáne tabysy bolmaǵan jaǵdaıda júkti áıel jeńildik sanaty boıynsha saqtandyrylǵan mártebesine ıe bolady.
— Júkti áıelge emhanada qandaı medıtsınalyq qyzmetter qoljetimdi?
— Esepke turǵannan keıin áıeldiń jaǵdaıy turaqty baqylaýǵa alynady. Júktilik kezeńine sáıkes zerthanalyq taldaýlar, úsh kezeńdi perınataldyq skrınıng aıasynda ÝDZ zertteýleri, qajet bolǵan jaǵdaıda beıindi mamandardyń keńesi júrgiziledi.
Sonymen qatar, áıel densaýlyq jaǵdaıyna baılanysty táýliktik nemese kúndizgi statsıonarda em ala alady. Barlyq qyzmet TMKKK jáne MÁMS aıasynda kórsetiledi.
Ana men bala densaýlyǵy — densaýlyq saqtaý júıesiniń erekshe baqylaýynda. Sol sebepti júktilikti ýaqytyly esepke qoıyp, ár trımestrde belgilengen tekserýlerden ótý mańyzdy. Bul ana men balanyń densaýlyǵyn qorǵaýǵa jáne asqynýlardyń aldyn alýǵa kómektesedi.
Buǵan deıin júktilik jáne bosanýǵa baılanysty tólemge ótinishti endi ekinshi deńgeıli bankter arqyly berýge bolatyndyǵyn jazǵan edik.