JOO oqytýshylary men ǵylymı qyzmetkerlerdiń jalaqysy qalaı kóteriledi
ASTANA. KAZINFORM - 2022 jyldyń qarasha aıynda Prezıdent Qasym-Jomart Toqaev Almatyda stýdenttermen jáne jas ǵalymdarmen kezdesýde oqytýshylar men ǵalymdardyń jalaqysyn kóterýdi tapsyryp, stýdenttermen qatar elimizdiń bilim berý júıesinde pedagog ta basty tulǵaǵa aınalýǵa tıis ekenin atap ótti.
Memleket basshysynyń tapsyrmasyn oryndaý maqsatynda Qazaqstan Respýblıkasynda joǵary bilim men ǵylymdy damytýdyń 2023-2029 jyldarǵa arnalǵan tujyrymdamasyna joǵary bilim berý sapasyn jáne ǵylymı zertteýlerdiń nátıjeliligin arttyrýǵa baǵyttalǵan ózgerister engizildi.
Máselen, joǵary oqý oryndarynyń professor-oqytýshylar quramynyń jalaqy mólsheri 160,7 myń teńgeden 350 myń teńgege deıin, ulttyq joǵary oqý oryndarynda 228,8 myń teńgeden 400 myń teńgege deıin ósti.
«2023 jylǵy 1 qańtardan bastap ǵylymı uıymdar qyzmetkerleriniń laýazymdyq jalaqysy 18%-ǵa, 2024 jylǵy qańtardan bastap — 18%-ǵa, 2025 jylǵy qańtardan bastap — 17%-ǵa ulǵaıtyldy.
Budan basqa, «Qazaqstan Respýblıkasynyń keıbir zańnamalyq aktilerine ǵylym jáne bilim berý máseleleri boıynsha ózgerister men tolyqtyrýlar engizý týraly» Zańda kózdelgen normalar sheńberinde ǵylymı ataqtardyń bolýy úshin ǵylymı qyzmetkerlerge qosymsha aqy mólsheri ulǵaıtyldy. Bul zańǵa Memleket basshysy osy jyldyń 6 mamyrynda qol qoıdy», — dep jazdy Ǵylym jáne joǵary bilim mınıstrliginen.
Zańǵa engizilgen túzetýlerdiń birinshi blogy pedagogter men ǵylymı qyzmetkerlerdiń materıaldyq jaǵdaıyn jaqsartýǵa baǵyttalǵan. Atap aıtqanda, belgili bir ǵylymı dárejesi men ataǵy bar pedagogter úshin aı saıyn tólenetin qosymsha aqy mólsheri ulǵaıtyldy. Máselen, fılosofııa doktory (PhD), beıini boıynsha doktor, ǵylym kandıdaty ǵylymı dárejesi jáne qaýymdastyrylǵan professor (dotsent) ataǵy úshin tólenetin qosymsha aqy 25 AEK-ti (92 300 teńge) quraıdy. Al ǵylym doktory jáne qaýymdastyrylǵan professor (dotsent) ǵylymı ataǵy úshin 42 AEK (155 064 teńge), fılosofııa doktory (PhD), beıini boıynsha doktor, ǵylym kandıdaty, ǵylym doktory dárejesi jáne professor ǵylymı ataǵy úshin 50 AEK (184 600 teńge) mólsherinde qosymsha aqy tólenedi.
Ǵylymı dárejeleri men ataqtary úshin osyndaı aı saıynǵy qosymsha aqy negizgi jumys ornynda ǵylymı-zertteý jumystaryn júrgizetin ǵylymı qyzmetkerlerge de belgilendi.
40 jasqa tolmaǵan daryndy jas ǵalymdarǵa joǵary jáne (nemese) joǵary oqý ornynan keıingi bilim berý uıymynyń endaýment-qorynyń ınvestıtsııalyq kiris qarajatynan stıpendııa alý quqyǵy berildi.
