JOO-ǵa qujat tapsyrý: narkodıspanserdiń qaǵazy kerek pe

ASTANA. KAZINFORM – Erteńnen bastap JOO ǵımarattarynda uzyn-sonar kezek paıda bolmaq. Mektep túlekteri bilim grantyn ıelený úshin jappaı qujattaryn ótkize bastaıdy.

Mundaı kezde keıbir túlekter, tipti, ata-analar da kúızeliske túsip, bolashaqqa alańdaıtyny belgili. Keıbireýi jalǵan aqparattyń jetiginde ketip, qujat jınaýǵa bas qatyrady. Olaı deıtinimiz, keıbir túlekter narkodıspanserdiń qaǵazy kerek dep zyr júgirip júr. Osy rette, Ulttyq testileý ortalyǵynyń baspasóz qyzmetine habarlasyp, qandaı qujattar qajet ekenin surap bildik.

«Grant konkýrsyna qujattar qabyldaý 13-20 shilde aralyǵynda, Aqmola, Aqtóbe, Atyraý, Batys Qazaqstan, Qostanaı, Soltústik Qazaqstan oblystarynyń talapkerleri úshin 13-24 shilde aralyǵynda júzege asyrylady. Qujattardy joǵary oqý oryndarynyń qabyldaý komıssııalary arqyly oflaın jáne eGov arqyly onlaın tapsyrýǵa bolady», - deıdi Ulttyq testileý ortalyǵynyń baspasóz qyzmeti.

Sonymen, qandaı qujattar qajet?

- jeke kýálik;

- UBT sertıfıkaty;

- 3h4 kólemindegi foto;

- orta bilim týraly attestat (kolledj túlekteri úshin dıplom);

- jeńildetilgen sanat boıynsha konkýrsqa qatysý úshin rastaıtyn qujattar;

- B167 Ushý apparattaryn jáne qozǵaltqyshtardy ushyryp paıdalaný mamandyǵy úshin dárigerlik ushý-saraptamalyq komıssııasynyń medıtsınalyq kýálandyrýy;

- pedagogıkalyq jáne medıtsınalyq mamandyqtar úshin arnaýly emtıhan nátıjesi kerek.

Qosymsha aqparat boıynsha JOO-lardyń qabyldaý komıssııalaryna júginýge bolady.

Aıta keteıik, búgin UBT qorytyndysy shyǵyp, bilim granttarynyń sany belgili boldy.