Joldaýdy tyńdap, ustazdyq joldy tańdaǵanyma qýandym - stýdent
«Qazir stýdentterdiń erteńgi kúni jumysqa ornalasyp ketýi ekitalaı. Prezıdent biz sııaqty bolashaq mamandar úshin eń ózekti máseleni kóterdi. Sondaı-aq, Elbasy joǵary oqý oryndaryn irilendirý saıasatyn júrgizýdi tapsyrdy. «Naryqta sapaly bilim berýdi qamtamasyz etetin JOO-yn ǵana qaldyrý qajet» dedi. Bul - óte durys sheshim. Sebebi, qazir qanshama jas dıplom alyp, jumyssyz júr. Al Prezıdent tapsyrǵan JOO irilendirý saıasatynynyń ishine oqý bitirgen stýdentterdiń jumyspen qamtylýy, jalaqysy joǵary jumysqa ornalasýy - barlyǵy eskeriledi. Endi tórt jyl boıy osy mamandyqpen jumys tabyla ma, tabylmaı ma dep ýaıymǵa salynbaımyz. Esesine alańsyz, sapaly bilim alamyz», - deıdi Vasılıı Nemtsev.
Sondaı-aq, bolashaq maman keler jyly «Pedagogtardyń mártebesi» týraly zań qabyldanatynyna qoldaý bildirip otyr. Bul mańyzdy qujat onyń bolashaq mamandyǵyna degen senim júgin arttyrǵanyn aıtady.
«Mektepke muǵalim bolyp barǵanda men ózimniń mártebem zańmen bekitilgenin, jalaqymnyń kúnkóriske jetetinin bilip, nyq senimmen jumys isteımin. Bul meniń ustaz bolýǵa degen qulshynysymdy, mamandyǵyma degen súıispenshiligimdi arttyra túsedi. Mamandyǵyn súıgen adam, qashanda sapaly, tabysty jumys isteýge tyrysatyny belgili», - deıdi Іlııas Jansúgirov atyndaǵy Jetisý memlekettik ýnıversıtetiniń stýdenti.
Aıta keteıik, búgin Elbasy Joldaýyn І.Jansúgirov atyndaǵy Jetisý memlekettik ýnıversıtetiniń oqytýshy-professorlar quramy men qyzmetkerleri jáne stýdentter qaýymy úlken ekrannan tamashalady. Endi JOO ujymy aldaǵy ýaqytta Joldaýda aıtylǵan maqsat-mindetterdi oryndaý jolynda keshendi is-sharalar josparyn quryp, júzege asyrmaq nıette.
