Joldaýda ǵylym salasyn damytýǵa mańyz berildi - Gaýhar Aldambergenova
Onyń paıymdaýynsha, bilim jáne ǵylym salasyna jańa naqty mindetter qoıdy. Prezıdent atap kórsetken basym baǵyttar el ekonomıkasynyń basty ózegi sanalatyn atalǵan salalardyń zamanǵa saı damýyna zor serpin beredi.
«Memleket basshysy 2021 jyldyń qańtar aıynan bastap muǵalimderdiń jalaqysyn 25 paıyzǵa kóterý týraly sheshim qabyldady. Belgili bolǵandaı, eńbekaqy mólsheri keleshekte de arta bermek. Bul maqsatta aldaǵy úsh jylda qosymsha 1,2 trln teńge bólinbek. Sońǵy jyldary elimizde ustaz bedelin, pedagog mártebesin kóterý jolynda eleýli ister atqarylyp, naqty jumystar júzege asýda. Máselen, bir ǵana «Pedagog mártebesi týraly» Zańnyń qabyldanýy – qazaqstandyq ustazdar qaýymynyń qoǵamdaǵy bedelin arttyryp, ornyn aıshyqtaýǵa baǵyttalǵan zor qadam boldy. 21 baptan turatyn jańa Zań jarty mıllıonnan astam ustazdyń jumysyna qatysty. Onda tórt baǵyt qamtylǵan. Birinshiden, pedagogtardyń quqyqtaryn keńeıtý jáne ózine tán emes jumystardan bosatý, olardyń júktemesin azaıtý. Ekinshiden, muǵalimniń qyzmetine qoıylatyn talaptardy kúsheıtý. Úshinshiden, materıaldyq emes yntalandyrý tetikteri jáne tórtinshiden, materıaldyq yntalandyrý qadamdary. Prezıdenttiń búgin jarııalaǵan sheshimi osy zań aıasynda qolǵa alynǵanyn atap ótken lázim», – dedi Gaýhar Aldambergenova.
Sonymen qatar, ol ustaz bedeliniń artýy, eńbekaqynyń jyl saıyn kóterilýi – bilikti de bilimdi, «ustaz» degen atqa laıyqty naǵyz mamandar mektebiniń qalyptasýyna negiz bolatynyn atap ótti.
«Búginde muǵalim bedelin arttyrýmen qatar, pedagog kadrlaryn daıarlaıtyn oqý oryndarynyń da mańyzy aıqyndalýda. Elimizdegi eń irgeli joǵary oqý orny Qazaq ulttyq qyzdar pedagogıkalyq ýnıversıteti negizinen aýyldyq eldi mekenderdegi bilim oshaqtary úshin maman daıarlaıdy. Óziniń 75 jyldyq tól tarıhynda oqý orny 60 myńnan astam pedagog daıyndady. Qazirgi kúnde oqý ornynda bolashaq pedagogtardyń kásibı beıimdelýi úshin pedagogıkalyq kadrlardy daıarlaýdyń bilim berý baǵdarlamalary tájirıbege baǵyttalǵan. Tájirıbege baǵyttalýy – birinshi kýrstan tórtinshi kýrsqa deıin tájirıbeden ótý arqyly júzege asyrylady. Bul óz kezeginde bolashaq mamandardyń teorııa men tájirıbeni utymdy úılestirip, biliktiligin arttyrýǵa zor serpin beredi», – deıdi Qyzdar ýnıversıtetiniń rektory.
Gaýhar Aldambergenova Joldaýda atap kórsetilgen ǵylymı áleýetti damytý men jas ǵalymdardy yntalandyrý – atalǵan salanyń qarqyndy damýyna oń yqpal etetine senimdi.
«Jańalyǵy jelmen jarysqan búgingideı zamanda ǵylym salasyna memleket tarapynan zor kóńil bólinip, eleýli qoldaý kórsetilip kele jatyr. Qazaqstannyń bul taraptaǵy maqsaty – ǵylymnyń damýyna jańa qarqyn berý, onyń damýy úshin durys baǵyttardy qabyldaý jáne otandyq bıznestiń ǵylymmen tyǵyz baılanysta bolýyna yqpal etý. Bul oraıda elimizde birshama bastamalar qolǵa alyndy. Búgin sonyń birqataryn Prezıdent naqty atap kórsetti. Atap aıtqanda, ǵylymı jobalardy qarjylandyrýǵa memlekettik qazynadan qomaqty qarajat bólinip, jas ǵalymdardyń ǵylymı ıdeıalary jan-jaqty yntalandyrylmaq»,– deıdi ol.
Ýnıversıtet rektory óz sózinde Qazaqstan jas ǵalym-pedagogtary Qaýymdastyǵy týraly da atap ótti.
«Qaýymdastyq elimizdiń pedagog mamandaryn daıyndaıtyn joǵary oqý oryndarymen birlesip, bilim berý men ǵylym salasyndaǵy bolyp jatqan birqatar bastamalardy iske asyrýǵa atsalysty. Qaýymdastyqtyń negizgi maqsaty – elimizdiń jas pedagog-ǵalymdarynyń dıalog alańyn uıymdastyrý, bilim men ǵylymdy ushtastyra otyryp, jastardyń ǵylymı ıdeıalarynyń bilim berý salasyna enýine yqpal jasaý. Atalǵan Qaýymdastyq aldaǵy ýaqytta Prezıdent Joldaýynda atap kórsetilgen ǵylym salasyn damytýǵa óz úlesin qosatyn bolady», – dedi spıker.
Onyń aıtýynsha, jańa myńjyldyqta bilimi men biligi úılesken mamandardyń bási basym bolady. Buny ýaqyttyń ózi aıqyndap otyr.
«Otandyq joǵary oqý oryndarynyń aldynda oı-órisi damyǵan, talantty, zerdeli jáne ultjandy urpaq tárbıeleý mindeti tur. Osy oraıda Memleket basshysy búgingi Joldaýynda onyń negizgi tetikterin aıqyndady. Prezıdenttiń bıylǵy Joldaýy biz úshin osynysymen qundy, osynysymen mańyzdy», – dep sózin túıindedi Gaýhar Tóremuratqyzy.
