Joldaý mindetteri: Bilim mekemelerindegi jylý qazandyqtary senimmen basqarýǵa berilýde
QR Prezıdenti Nursultan Nazarbaev 2017 jylǵy 31 qańtardaǵy «Qazaqstannyń úshinshi jańǵyrýy: jahandyq básekege qabilettilik» atty Joldaýynda «Jekemenshik kapıtal tartý úshin memlekettik-jekeshelik áriptestiktiń yqtımal barlyq túri men nysanyn paıdalaný qajet. Olar - memlekettik múlikti senimdi basqarý, qyzmet kórsetý kelisimsharttary, taǵy basqalar. Bul rette kelisimniń barlyq rásimderin, ásirese shaǵyn jobalarǵa qatysty rásimderdi meılinshe jeńildetý jáne jedeldetý qajet», dep atap ótken bolatyn. Búgingi kúni bul mindetter Aqmola oblysynda da oıdaǵydaı júzege asyrylýda.
Aqmola oblysy bilim basqarmasynyń deregi boıynsha, 2017 jyly Tselınograd aýdanynda alǵashqy bolyp, áleýmettik nysandardaǵy jylý qazandyqtary memlekettik-jekeshelik áriptestik sheńberinde «TsTK» JShS-ne 15 jyl merzimge senimmen basqarýǵa berildi. Osynyń arqasynda aýdanda bıýdjettiń 25 mıllıon teńge qarjysy únemdelgen.
Tselınograd aýdandyq bilim bóliminiń basshysy Qanat Ahmetovtyń aıtýynsha, mektepter men balabaqshalardaǵy jylý qazandyqtaryn jekemenshik kompanııalarǵa senimmen basqarýǵa berý bilim berý mekemeleri basshylaryn basy artyq sharýadan bosatyp otyr.
«Bilim berý mekemelerindegi avtonomdy jylý qazandyqtarynyń barlyǵy «TsTK» JShS senimmen basqarýǵa berildi. Bul mektep dırektorlary men balabaqsha meńgerýshilerine tek bilim berý jáne bala tárbıesimen alańsyz aınalysýyna múmkindik beredi. Endi olar kómirmen qamtamasyz etý, qazandyqtardy jóndeý jáne otjaǵýshynyń aılyǵyn tóleý sııaqty sharýalarǵa bas qatyrmaıdy. Ótken jyly jylý berý maýsymyn oıdaǵydaı ótkizdik, bıyl da solaı bolady dep oılamyn», - deıdi Qanat Ahmetov.
Mektep dırektorlar bolsa, ıyqtan aýyr júk túskendeı boldy dep otyr.
«Buryndary qatty aıazdy kúnderi muǵalimder kezekshilik etetin edi. Qazir oǵan oǵan bas qatyrmaıdy. Mektep jyly, muǵalimder alańsyz sabaqtaryn ótkizedi», - deıdi Talapker aýylynyń mektep dırektory Saǵymbala Ábeeva.
Ótken jyly Tselınograd aýdany boıynsha 8 mektep pen 4 mádenıet úıiniń qabyrǵasynda ornalasqan 11 jylý qazandyǵy syrtqa shyǵaryldy. Bólek ornalasqan qazandyq bir jaǵynan qolaıly bolsa, endi bir jaǵynan oqýshylar úshin qaýipsiz.
Al, bıyl 2018 jyly Bulandy, Zerendi jáne Shortandy aýdandaryndaǵy bilim berý mekemelerindegi avtonomdy jylý qazandyqtary memlekettik-jekeshelik áriptestik sheńberinde senimmen basqarýǵa berilip otyr. Bul memlekettik bıýdjetke 70-90 mıllıon teńge qarjyny únemdeýge múmkindik bermek.
Aqmola oblysy bilim basqarmasyndaǵylar óńirde barlyǵy 560 mekteptiń baryn aıtýda. Aldaǵy jyly oblystyń ózge aýdandaryndaǵy barlyq mektepter men balabaqshalardaǵy jylý qazandyqtary memlekettik-jekeshelik áriptestik sheńberinde jekemenshik kompanııalarǵa 15 jylǵa merzimge senimmen basqarýǵa berý josparlanyp otyr.
