Joǵary oqý oryndarynda abıtýrıentterden qujat qabyldaý júrip jatyr

ASTANA. QazAqparat – 2023-2024 oqý jylyna joǵary oqý oryndaryna túsý úshin qujattardy qabyldaý 20 maýsym men 25 tamyz aralyǵynda júredi. 13-20 shildede bilim berý granttarynyń konkýrsyna ótinish qabyldaý ótedi, dep habarlaıdy QazAqparat Ǵylym jáne joǵary bilim mınıstrliginiń baspasóz qyzmetine silteme jasap.

Otandyq JOO-larǵa oqýǵa túsý úshin talapkerler jeke kýálik, UBT sertıfıkatyn, 3h4 kólemindegi foto, orta bilim týraly attestat (tehnıkalyq jáne kásiptik bilim berý (TjKB) uıymdarynyń túlekteri úshin dıplom), №075/ý nysanyndaǵy medıtsınalyq anyqtama, er jigitter úshin áskerı tirkelý kýáligin tapsyrý kerek. Sondaı-aq, jeńildetilgen sanat boıynsha konkýrsqa qatysý úshin rastaıtyn qujattar usynylady.

Oqýǵa túsýshiler 18 mamyrda bastalyp, 5 shildege deıin ótetin UBT-nyń eki nátıjesiniń bireýin grant konkýrsyna usyna alady. Bilim berý granty ıegerleriniń tizimi 10 tamyzǵa deıin jarııalanady.

Aıta ketsek, «Pedagogıkalyq ǵylymdar» jáne «Densaýlyq saqtaý» bilim berý salalary boıynsha qabyldaý arnaýly emtıhan nátıjeleri esepke alyna otyryp júrgiziledi. Bul emtıhan JOO bazasynda 20 maýsym men 20 tamyz aralyǵynda ótkiziledi.

Shyǵarmashylyq emtıhandarǵa qatysý úshin ótinishterdi JOO-lar 20 maýsymnan 7 shildege deıin qabyldaıdy, emtıhandardyń ózi 8-15 shilde aralyǵynda ótedi.