Joǵary sot keńesi 17 sýdıany qyzmetinen bosatady
ASTANA. KAZINFORM — Joǵary sot keńesiniń kezekti otyrysy ótti. Otyrys barysynda keńes janyndaǵy komıssııalar men sot jıýrıiniń 2025 jylǵy jumys qorytyndylary, sondaı-aq sot júıesin kadrlyq qamtamasyz etý máseleleri qaraldy, dep habarlaıdy keńestiń baspasóz qyzmeti.
2025 jylǵy 2 qyrkúıekte Joǵary sot keńesiniń tóraǵasy Dmıtrıı Malahovtyń tapsyrmasy boıynsha sot júıesiniń qajettilikterin eskere otyryp, belgilengen kesteden tys jer, korporatıvtik, salyq jáne qarjy quqyqtary salalaryndaǵy mamandar úshin 10 oblystyq jáne olarǵa teńestirilgen sottarda 13 bos sýdıa laýazymyna konkýrs jarııalanǵan bolatyn.
— Sot júıesine bilikti zańgerlerdi tartý maqsatynda Keńes alǵash ret advokattar men zańgerler qaýymdastyqtary, sondaı-aq quqyq qorǵaý jáne arnaýly organdardyń qyzmetkerleri úshin túsindirý baǵytyndaǵy onlaın-semınarlar ótkizdi. Bul ótken jylmen salystyrǵanda irikteýge qatysýshylar sanyn eki esege jýyq arttyrýǵa múmkindik berdi, — dep atap ótti D. Malahov.
Taǵaıyndaýǵa usynylǵan kandıdattar týraly málimetter keńestiń resmı YouTube-arnasyndaǵy otyrystyń onlaın-translıatsııasy barysynda jarııalanyp, sondaı-aq resmı ınternet-resýrsta ornalastyryldy.
Sonymen qatar, Joǵary sot keńesi janyndaǵy Biliktilik komıssııasynyń, Kadrlyq rezerv jónindegi komıssııanyń jáne Sot jıýrıiniń 2025 jylǵy qyzmet qorytyndylary shyǵaryldy.
Buǵan deıin kandıdattardyń biliktilik emtıhanynyń kezeńderinen ótýi birneshe aıǵa sozylatyn. Protsedýralardy ońtaılandyrý maqsatynda ony ótkizý tásilderi qaıta qaralyp, Biliktilik komıssııasynyń quramy jańartyldy jáne emtıhan formaty ózgertildi. Qazir emtıhandar aı saıyn ótkizilip, olardan ótýdiń jalpy merzimi 1,5 jyldan úsh aıǵa deıin qysqartyldy.
Joǵary sot keńesi janyndaǵy sot jıýrıi qyzmetiniń taldaýy birizdi jáne ornyqty tártiptik praktıka qalyptasqanyn kórsetedi. 2024 jáne 2025 jyldardaǵy tártiptik jazalar sany shamalas bolǵanyna qaramastan, sot jıýrıi sheshimderine shaǵymdaný sany úshten birine qysqardy.
Kadr rezervi týraly sóz qozǵaǵan Keńes tóraǵasy onyń sýdıalar korpýsyn jańartýdyń tıimdi tetigi bolýy tıis ekenin atap ótti. Talaptardy kúsheıtý jáne sanyn ońtaılandyrý nátıjesinde 2025 jyly kadr rezervinen joǵary turǵan jáne basshylyq laýazymdarǵa 42 sýdıa taǵaıyndaldy (2024 jyly — 9).
Otyrys barysynda keńes ártúrli negizder boıynsha 17 sýdıany qyzmetinen bosatýdy usyndy. Sondaı-aq zeınet jasyna jetken eki sýdıanyń ókilettigi uzartyldy.
Sot jıýrıiniń tártiptik jaýapkershilikke tartý týraly sheshimderine shaǵymdanǵan úsh sýdıanyń ótinishteri qaraldy. Qaraý nátıjeleri boıynsha barlyq sheshim negizdi dep tanylyp, kúshinde qaldyryldy.
Joǵary sot keńesi irikteý rásimderiniń ashyqtyǵyn arttyrý, sýdıalardyń táýelsizdigin nyǵaıtý jáne sýdıalar korpýsynyń oń ımıdjin qalyptastyrý baǵytyndaǵy jumysyn jalǵastyrady.
Buǵan deıin Astanada mas kúıinde kólik júrgizgen sýdıa qyzmetinen bosatylǵanyn jazǵan edik.