Joǵary oqý oryndaryn basqarýdyń jańa modeli ázirlenip jatyr
ASTANA. KAZINFORM – Joǵary oqý oryndaryn basqarýdyń jańa modeli ázirlenip jatyr. Bul týraly Májilis depýtattarynyń saýalyna Premer-Mınıstrdiń orynbasary Tamara Dúısenovanyń jaýabynda aıtylǵan.
«Joǵary oqý oryndaryndaǵy sapaly korporatıvtik basqarý máselesi olarǵa berilgen akademııalyq jáne basqarýshylyq derbestikti tolyqqandy júzege asyrý, joǵary jáne joǵary oqý ornynan keıingi sapaly bilimdi qamtamasyz etý úshin óte mańyzdy. Osyǵan oraı, bıyl 14 aqpanda ótken Ǵylym jáne joǵary bilim, Oqý-aǵartý mınıstrlikteriniń alqa májilisinde atalǵan másele «Barlyǵyna qoljetimdi, sapaly bilim» ulttyq baıandamasyn talqylaý aıasynda táýelsiz sarapshylyq qoǵamdastyqtyń qatysýymen qaraldy. Qazirgi ýaqytta Ǵylym jáne joǵary bilim mınıstrliginiń janynda JOO-lardy basqarýdyń jańa modelin ázirleý jónindegi jumys toby jumys isteıdi», - dedi vıtse-premer.
Onyń atap ótýinshe, jumys tobynyń quramynda korporatıvtik sektordyń, Táýelsiz dırektorlar qaýymdastyǵynyń, «Atameken» UKP-nyń, Ǵylym jáne joǵary bilim máseleleri jónindegi qoǵamdyq keńestiń, JOO-lardyń ókilderi bar.
«Jumys toby joǵary oqý oryndary Dırektorlar keńesiniń táýelsizdigi men jumys tıimdiligine jan-jaqty saraptama júrgizetin bolady. Sonymen qatar ombýdsmen ınstıtýtynyń, stýdentter men oqytýshylardyń quqyǵyn qorǵaý jónindegi ýákildiń, jemqorlyqqa qarsy komlaıens-qyzmettiń jáne basqalarynyń qyzmeri qarastyryldy. Barlyq JOO-larda korporatıvtik basqarý kodeksin jetildirý boıynsha naqty usynystar ázirlendi», - dedi Tamara Dúısenova.
