Joǵary bilimdi qoljetimdi etý: «Keleshek» biryńǵaı erikti jınaqtaý júıesin ázirleý bastaldy
QR Premer-Mınıstri Álıhan Smaıylovtyń tóraǵalyǵymen ótken Memleket basshysynyń Saılaýaldy baǵdarlamasy men Joldaýyn iske asyrý jónindegi respýblıkalyq shtab otyrysynda «Keleshek» biryńǵaı erikti jınaqtaý júıesin engizý jónindegi sharalar qaraldy.
Ǵylym jáne joǵary bilim mınıstri Saıasat Nurbek bala týý kórsetkishiniń kóbeıýine baılanysty bolashaqta bilim berý júıesine túsetin júktemeniń edáýir artatynyn atap ótti.
Osyǵan baılanysty Memleket basshysynyń Joldaýyn oryndaý aıasynda azamattarǵa joǵary bilimdi qoljetimdi etýdiń qosymsha tetigi retinde qoldanystaǵy qoldaý sharalaryn biriktiretin «Keleshek» biryńǵaı erikti jınaqtaý júıesin ázirleý bastaldy.
Premer-Mınıstr «Keleshek» erikti jınaqtaý júıesin engizý máselesi qazaqstandyq otbasylardyń barlyǵyna qatysty ekenin atap ótti.
«Onda memleketten beriletin bastapqy kapıtal, ata-analardyń erikti salymdary, ınvestıtsııalyq kiris jáne memlekettik syıaqy qarastyrylǵan. Osylaısha, jeńildetilgen bilim berý nesıeleriniń ıntegratsııasyn eskere otyryp, “Keleshek” biryńǵaı ortaq jınaqtaý júıesinde memlekettik qoldaý sharalary shoǵyrlandyrylatyn bolady. Oqýǵa túskenshe jınaqtalǵan qarajat joǵary bilimdi neǵurlym qoljetimdi etýge múmkindik beredi», — dedi Álıhan Smaıylov.
Sonymen qatar 2019 jyldan 2022 jylǵa deıin týý kórsetkishiniń ósýin eskere otyryp, 2040 jylǵa qaraı 18 jastaǵy qazaqstandyqtar sany aıtarlyqtaı ósedi dep kútilýde.
Bul rette granttar sanyn arttyrý olardyń kóbin joǵary bilimmen qamtýǵa múmkindik bermeıdi.
«Keleshek» osy máselelerdi sheshýge kómektesýi kerek. Bilim berýdiń qoljetimdiligi men sapasy resýrstardy shoǵyrlandyrý jáne memleket, bıznes, oqý oryndary men azamattar arasynda jaýapkershilikti bólý esebinen qamtamasyz etiletin bolady. Bul birinshi mamandyqty alǵanǵa deıin balalardy tolyq qoldaýǵa múmkindik beredi», — dedi Álıhan Smaıylov.
Premer-Mınıstr «Keleshek» júıesin kelesi jyly engizý qajet ekenin atap ótti.
