Joǵarǵy Sotta jańa úlgidegi sýdıalar mantııasyn bekitý máselesi qaraldy
Birinshi másele boıynsha Almaty oblystyq sotynyń sot alqasy tóraǵasynyń bos laýazymyna kandıdatýralar balamaly negizde usynyldy.
Talqylaý qorytyndysy boıynsha Joǵarǵy Sot sýdıalary eki kandıdatqa - Almaty qalasynyń qylmystyq ister jónindegi mamandandyrylǵan aýdanaralyq áskerı sotynyń tóraǵasy Sársenov Sovethan Sákenuly men Almaty qalasynyń №2 Bostandyq aýdandyq sotynyń tóraǵasy Shámshıev Arman Jumabaıulyna biraýyzdan oń qorytyndy berdi.
Daýys berý qorytyndysy boıynsha Joǵarǵy Sottyń jalpy otyrysynyń tıisti qaýlysy men qorytyndysy Joǵary Sot Keńesine joldaý úshin ázirlendi. «Sot júıesi men sýdıalardyń mártebesi týraly» Qazaqstan Respýblıkasynyń Konstıtýtsııalyq zańyna sáıkes endi Joǵary Sot Keńesi atalǵan kandıdattardy laýazymǵa taǵaıyndaý jóninde Memleket basshysyna usynym jasaıtyn bolady.
Ekinshi másele boıynsha. Sýdıalardyń mantııasyn aýystyrý qajettigi týraly 2013 jyly ótken Sýdıalardyń altynshy sezinde aıtylǵan bolatyn. Sezd sheshimi boıynsha Sýdıalar odaǵynyń Ortalyq Keńesi mantııanyń jańa úlgisin sýdıalar qaýymdastyǵy arasynda talqylaýdan ótkizdi. Saýalnama nátıjesi respýblıka sýdıalarynyń qoǵamdyq birlestiginiń barlyq fılıaldary mantııanyń qazirgi stıli áli de bolsa jetildirýdi talap etetindigimen kelisetindigin kórsetti. Sýdıalar mantııanyń pishini men matasyna qatysty óz usynys-eskertpelerin aıtty.
Mantııanyń jańa úlgisin Almaty tehnologııa ýnıversıtetiniń Jeńil ónerkásip jáne dızaın fakýltetiniń dekany R. Jylysbaeva bastaǵan oqý-óndiristik ortalyǵynyń dızaınerleri ázirledi.
Álemdik tájirıbege sáıkes jańa mantııa trapetsııa tárizdi, jelbegeı pishinde bolyp keledi, ol sýdıalardyń beıtaraptylyǵyn bildiredi, sondaı-aq sot bıliginiń mártebesi men bedelin aıqyndaıdy. Usynylyp otyrǵan mantııanyń keskini tutas ári yqsham, túsi men stıldik sheshimi úılesimdi.
Sýdıalar mantııasy memlekettik bılik nyshandarynyń biri bolyp tabylady. Ol sýdıalar tarapynan sot protsesine qatysatyn taraptarǵa jáne sot tóreligin júzege asyrý barysyna qatysatyndardyń barlyǵyna sýdıalardyń aıryqsha mártebesin eske salýǵa baǵyttalǵan.
Mantııanyń jańa úlgisi Joǵarǵy Sottyń jalpy otyrysynda biraýyzdan bekitildi.
Q.Mámı jańa mantııany eskisiniń tozýyna qaraı qoldanysqa birtindep engizýdi tapsyrdy. «Jańa úlgidegi mantııany qoldanysqa engizý bıýdjetten qosymsha qarajat bólýdi talap etpeýi tıis» - dedi Joǵarǵy Sot Tóraǵasy.
