Joǵalǵan qylmystyq ister qalpyna keltirilip jatyr - Bas prokýratýra

ASTANA. QazAqparat - Joǵalǵan 3,5 myń qylmystyq istiń ishinde bir bóligi qalpyna keltirildi. Bul týraly Parlament Májilisinde «Qazaqstan Respýblıkasynyń keıbir zańnamalyq aktilerine quqyqtyq qorǵaý qyzmetiniń protsestik negizderin jańǵyrtý máseleleri boıynsha ózgerister men tolyqtyrýlar engizý týraly» zań jobasyn tanystyrý barysynda. QR Bas prokýrorynyń orynbasary Marat Ahmetjanov málim etti, dep habarlaıdy QazAqparat.

«Joǵalǵan qylmystyq ister arhıvterde jáne basqa da jerlerde bolýy múmkin. Bul negizinen sheshim qabyldanbaǵan ári ýaqytsha toqtatylǵan ister. Jalpy, osyndaı 3,5 myń is anyqtaldy. Keıbir joǵaltylǵan ister qalpyna keltirilip, birqatar faktiler boıynsha qylmystyq ister qozǵaldy», - dedi Marat Ahmetjanov.

Onyń sózine qaraǵanda, tergeýshi qyzmetinen ketken kezde basqa tergeýshige tapsyrmaýyna baılanysty qylmystyq ister nazardan tys qalýy múmkin.

Bas prokýror orynbasarynyń atap ótýinshe, salaǵa elektrondyq júıeni engizý jumystary tolyq iske asyrylǵannan keıin, qujattardyń joǵalýyna jol berilmeıdi.

Budan buryn habarlanǵandaı, isti elektrondyq túrde júrgizýge bolady. 

Aldymen, tsıfrly format adamnyń quqyǵyn qorǵaýdy nyǵaıtady. Sebebi barlyq protsess alaqandaǵydaı kórinip turady. Bastysy - sot pen prokýrordyń baqylaýy artady. Endi jasyrý, jalǵan qujat jasaý degen múmkin emes. Sonymen qatar sybaılas jemqorlyq pen qyzmet babyn teris paıdalaný faktileri de azaıady. Bul - tsıfrlandyrýdyń eń basty maqsaty.

«Elektrondy is júrgizýge kóshken kezde biraz uıymdastyrý sharalary joıylady. Bir japyraq qujat alý úshin qazirgi tártipke saı úsh táýlik ótedi, al endi sonyń barlyǵyn bir saǵatta uıymdastyrýǵa bolady. Bul rette tergeýshiniń ýaqytyn únemdeıdi, asa aýyr qylmystarǵa kóbirek nazar aýdarýǵa múmkúndik beriledi», - dedi Marat Ahmetjanov.