Jınaq depozıtiniń tıimdiligi qandaı

ALMATY. QazAqparat - Qazaqstan depozıtterdi kepildendirý qorynyń tóraǵasy Nurlan Abdrahmanov depozıtterdiń jańa túri - jınaq depozıtteriniń tıimdiligi týraly aıtyp berdi, dep habarlaıdy QazAqparat tilshisi.

«Jańa erejelerge sáıkes, shuǵyl nemese shuǵyl emes teńge depozıtteri sharttarǵa baılanysty shekti mólsherleme 10,5% nemese 12,5%, maksımaldy kepildik somasy 10 mln teńge bolsa, jınaq depozıtte basqasha. Onda paıyzdyq mólsherleme 12% -13,5% -dan bastalady», - dedi Nurlan Abdrahmanov.

Ekinshi deńgeıli bankterde jınaq depozıtteri qazannan bastap qabyldanatyn bolady. Bul qarjysyn uzaq ýaqytqa saqtaıtyn tulǵalarǵa tıimdi bolmaq.

«Jınaq salymy asa mańyzdy sharaǵa aqsha jınaýdy kózdegen salymshyǵa tıimdi. Máselen, otbasylyq demalys, kólik, ıpotekaǵa alǵashqy salym jınaýǵa bolady. Adam depozıt salǵan soń ony sheship ala almaıdy. Aldyn ala alý úshin bankke 30 kún buryn aryz jazyp qoıyp, kelisimshartty buzady. Alaıda ondaı jaǵdaıda paıyzdyq mólsherleme 0,1% ǵana tólenedi», - dedi qor basshysy.

Mundaı depozıtti kez kelgen ýaqytta tolyqtyrýǵa bolady.

«Eger salymshy kelisimshartta belgilengen merzimge deıin aqshany almasa, onda salymshy aqshasyn alǵan kezinde oǵan ınflıatsııa kórsetkishinen asatyn soma tólenedi. Máselen, 3 aıǵa paıyzdyq mólsherleme 12 paıyz bolsa, 1 jylǵa - 13 paıyz degen sııaqty. Bıyl ınflıatsııa 5-7 paıyz bolady dep boljanyp otyr», - dedi ol.

Onyń aıtýynsha, mundaı depozıtterdi 3 aıdan bastap 24 aıǵa deıingi merzimge ashýǵa bolady.

«1 qazannan bastap qazaqstandyqtar jınaq depozıtinde 15 mln teńgege deıin jınaı alady. Bul qarjy memleketpen kepildendirilgen. Al basqa depozıt túrleri boıynsha kepildendirý somasy 10 mln teńge», - dedi qor basshysy.