Jylyjaılardyń kommýnaldyq shyǵynyna sýbsıdııa berile bastaıdy

Elimizde jylyjaıdaǵy egin sharýashylyǵyna jumsalatyn kommýnaldyq shyǵyndy sýbsıdııalaý kózdelip otyr. Bul týraly Aýyl sharýashylyǵy mınıstriniń orynbasary Amanǵalı Berdalın Atyraý oblysyndaǵy aýylsharýashylyq taýaryn óndirýshilermen kezdesýde aıtty, dep habarlaıdy Kazinform.

Mınıstr orynbasarynyń aıtýynsha, memlekettik Gosagro.kz júıesine kóshýdiń nátıjesinde fermerlerdi qoldaý sharalary artyp, olardyń shyǵyndary qysqartylǵan. Sýbsıdııaǵa qol jetkizýdi jaqsartý maqsatynda aýyl sharýashylyǵy taýaryn óndirýshiler úshin «kútý paraǵy» engizilgen.

«Bıyl fermerlerge arzandatylǵan dızel otynyn bólý protsesi tolyǵymen avtomattandyryldy. Agroónerkásip keshenin sýbsıdııalaý aıasynda fermerlerge 14 baǵyt boıynsha qoldaý kórsetiledi. Aldaǵy jyldyń 1 qańtarynan jylyjaılardyń sýyna, gazyna, jaryǵyna jumsalatyn shyǵyndy sýbsıdııalaımyz. Óıtkeni, jylyjaı – kúrdeli, qaıtarymy uzaq kásiptiń túri. Sýbsıdııany alý úshin jylyjaı kólemi mańyzdy emes. Máselen, jylyjaı kólemi 10-15 sharshy metr bolsa da, oǵan sýbsıdııa qarjysy bólinedi. Óńirlerde jylyjaı kóbeıse, naryqtaǵy baǵa da turaqty bolary anyq», - dedi Amanǵalı Berdalın.

Onyń málimetine súıensek, bıyl Atyraý oblysynyń agroónerkásip keshenine 4,9 mlrd teńge bólingen. Onyń ishinde ósimdik sharýashylyǵyna – 657,5 mln, mal sharýashylyǵyna – 3,1 mlrd, qarjy quraldaryna 1,1 mlrd teńge baǵyttalǵan. Al, «Aýyl amanaty» baǵdarlamasymen 1,5 mlrd teńge bólinip, sharýalarǵa 60-qa jýyq nesıe berilgen. Investıtsııalyq jobalardyń jol kartasy aıasynda 320 mln teńgeniń 2 jobasy iske asyrylǵan. Endi aldaǵy jyly 19,5 mlrd teńgeni quraıtyn 5 jobany iske asyrý josparlanǵan.

Jergilikti kásipkerler veterınarııa, ónim óndirý, et kombınaty, malshylar bedeli men jaıylym máselelerine alańdaýshylyq bildirdi. Olardyń keıbiri 300 myń teńge jalaqy usynsa da malshy tabylmaǵanyna qynjyldy. Osyǵan baılanysty malshy mártebesin kóterýdi, olardyń balalaryna áleýmettik qoldaý kórsetýdi usyndy.

«Atyraý oblysynyń tabıǵı-klımattyq jaǵdaıy eskerilip, mal sharýashylyǵy salasyna basymdyq beriledi. Munda egin sharýashylyǵynda da oń nátıje bar. Sizder kótergen máseleler men usynystar mınıstrlik deńgeıinde qaralatyn bolady», - dedi Amanǵalı Berdalın.

Eske sala ketelik, budan buryn Atyraýda áleýmettik mańyzy bar azyq-túlik baǵasy týraly jazǵan edik.