Jyldyq tabysy 33,4 mln teńgeden asatyn azamattar tabysynyń 15 paıyzyn salyqqa tóleýi múmkin

ASTANA. KAZINFORM – Premer-mınıstrdiń orynbasary – Ulttyq ekonomıka mınıstri Serik Jumanǵarın Salyq kodeksiniń jańa redaktsııasynda jeke tabys salyǵy tabys kólemine qaraı saralanatynyn aıtty.

- Mańyzdy bastamalardyń biri – jeke tabys salyǵynyń progressıvti mólsherlemesin engizý. Máselen, jyldyq tabysy 8 500 aılyq eseptik kórsetkishten ( 33 mln 422 myń teńge) asatyn qyzmetkerler úshin joǵary 15% mólsherlemeni belgileý usynylady. Bul joǵary tabysqa qosymsha salyq salynatyn tetikti qurýǵa múmkindik beredi, - dedi ol.

Serik Jumanǵarın memlekettik baǵaly qaǵazdarynan túsetin kiriske 10%-dyq korporatıvtik tabys salyǵy salynýdy usyndy. Olar qazir salyqtan bosatylǵan.

- Sondaı-aq kvazımemlekettik sektor sýbektileri shyǵarǵan baǵaly qaǵazdar boıynsha kiristerge salyq salý usynylady. Bul rette ekonomıkanyń naqty sektoryn qoldaý jáne ınfraqurylymdyq jobalarǵa ınvestıtsııalar tartý úshin «Báıterek» Ulttyq basqarýshy holdıngi shyǵarǵan baǵaly qaǵazdardan túsetin kiristerdi 2030 jylǵa deıin salyq salýdan bosatý usynylady. Bul ekonomıkaǵa jyl saıyn 10 trln teńge qarajat salýǵa múmkindik beredi. Zııandy sýsyndardy tutynýdy azaıtý úshin alkogolsiz energetıkalyq sýsyndarǵa aktsız engizý usynylady, - dedi vıtse-premer.

Aıta ketý kerek, Salyq kodeksiniń jańa redaktsııasynda QQS salynatyn aınalymnyń tómengi shegin 40 mln teńge dep belgileý usynylyp otyr.