Jyldyq ınflıatsııa tómendedi – Ulttyq bank

ASTANA. KAZINFORM – Ulttyq bank tóraǵasy Tımýr Súleımenov Úkimettiń ákimshilik sharalary qarasha aıynda jyldyq ınflıatsııanyń tómendeýine áser etkenin aıtty. 

- Qarasha aıynda jyldyq ınflıatsııa tómendep, 12,4 paıyz deńgeıinde qalyptasty. Inflıatsııa qurylymynda azyq-túlik taýarlary negizgi úlesti alyp otyr. Olardyń jyldyq ósimi 13,4 paıyz boldy.

Azyq-túlikke jatpaıtyn taýarlarynyń ınflıatsııasy qarashada 11,2 paıyz, aqyly qyzmetterdiń ınflıatsııasy 12,3 paıyz deńgeıinde qalyptasty, - dedi ol Úkimet otyrysynda.

Tımýr Súleımenov atalǵan oń dınamıkanyń negizgi sebebin de aıtty.

- Qazan-qarasha aılarynda jyldyq ınflıatsııanyń baıaýlaýyna Úkimettiń turǵyn úı-kommýnaldyq qyzmetterdiń tarıfterin tómendetýi áser etti. Sonymen qatar tarıfterdi kóterýmen janar-jaǵarmaı naryǵyn yryqtandyrý ınflıatsııa men ınflıatsııalyq kútýlerge janama áserin tıgizip otyr. Joǵary baǵa qysymynyń saqtalýy turaqty ishki suranys, fıskaldyq yntalandyrý jáne joǵary ınflıatsııalyq kútýlerge baılanysty. Qarashada aılyq ınflıatsııa 0,8 paıyz boldy. bul tarıhı ortasha mánderden tómen, - dedi Ulttyq bank basshysy.

Aıta keteıik, búgin Úkimette 11 aıdyń áleýmettik-ekonomıkalyq damý qorytyndysy qaralyp jatyr.