Jılber Ýngbo Qazaqstanda jasandy ıntellektiń damýyna oń baǵasyn berdi
ASTANA. KAZINFORM — Búgin Astana qalasynda Qazaqstan jumys berýshileriniń sezi ótti. Oǵan alǵash ret Halyqaralyq eńbek uıymynyń bas dırektory Jılber Ýngbo qatysty.
Óz sózinde Jılber Ýngbo Qazaqstandy Áleýmettik ádilettilik úshin jahandyq koalıtsııaǵa qosylýymen quttyqtady.
— Koalıtsııa — mańyzdy bastama. Bul sizderdiń elderińizdiń bolashaqty qurýdaǵy tájirıbesi men ozyq praktıkasymen áleýmettik ádilettilikpen, sonyń ishinde bilimge negizdelgen ekonomıkany damytý jáne JI arqyly bólisýge múmkindik beredi. Biz bul máselede sizdermen yntymaqtasýdy asyǵa kútemiz, — dedi HEU bas dırektory.
Ol sondaı-aq Qazaqstanda jasandy ıntellekti damytýǵa qatysty atqarylyp jatqan jumystarǵa oń baǵasyn berdi.
— Prezıdent Toqaevtyń basshylyǵymen Qazaqstan JI damytýǵa kiristi. Muny ınklıýzıvti jáne turaqty damý múmkindigi jáne Qazaqstandy Eýrazııadaǵy negizgi tsıfrlyq ortalyqtardyń biri retinde ornalastyrý múmkindigi retinde qarastyrasyzdar. Sizderdiń jaqynda qabyldaǵan Jasandy ıntellekti damytýdyń 2024-2029 jyldarǵa arnalǵan tujyrymdamasy Úkimet pen ekonomıkada jasandy ıntellekt tehnologııalaryn keńinen qoldanýdy qoldaýǵa baǵyttalǵan. Bul strategııa qazirdiń ózinde naqty nátıjelerge qol jetkizip, qarjy tehnologııalary men elektrondyq úkimet salasynda aıtarlyqtaı progreske qol jetkizdi, — dep atap ótti Jılber Ýngbo.
HEU basshysy JI tehnologııalaryn keńinen qoldanýǵa kóshý boıynsha birqatar usynys aıtty.
— Birinshiden, biz durys, suranysqa ıe daǵdylardy anyqtaýymyz kerek. Bul eresekterdi oqytýǵa ınvestıtsııany ulǵaıtýdy, sondaı-aq osy ózgeristerdiń artyqshylyqtary birkelki bólinýin qamtamasyz etý úshin eńbek naryǵyndaǵy naqty, belsendi saıasatty qajet etedi.
Ekinshiden, biz jumyskerlerdi tsıfrlyq revolıýtsııanyń kez kelgen jaǵymsyz áserinen qorǵaýymyz kerek. JI-men baılanysty jumys oryndary laıyqty eńbek standarttaryna sáıkes kelýi kerek. Jumyskerler de, jumys berýshiler de JI tehnologııalaryn ázirleýge jáne engizýge qatysýy kerek. Munda men áleýmettik dıalogtyń mańyzdy rólin atap ótkim keledi.
Úshinshiden, biz bul aýysý áleýmettik ádilettilik qaǵıdattaryn basshylyqqa alatynyna kepildik berýimiz kerek. Mysaly, ónimdiliktiń ósýi teń bólinedi jáne damýshy elder tehnologııanyń artyqshylyqtaryn barynsha paıdalaný úshin qoldaýalady, — dep atap ótti Jılber Ýngbo.
Halyqaralyq eńbek uıymynyń bas dırektory Jılber Ýngbo Respýblıkalyq eńbek qaýipsizdigi jáne eńbekti qorǵaý ǵylymı-zertteý ınstıtýtynyń qyzmetine oń baǵa berdi.
— Qurylǵanyna 20 jyl bolǵan Eńbekti qorǵaý jónindegi respýblıkalyq ǵylymı-zertteý ınstıtýtynyń jumysyna toqtala keteıin. Instıtýt Qazaqstan boıynsha mańyzdy zertteý jumystaryn júrgizip, qundy halyqaralyq seriktestikter ornatty. Ol ázirlegen 2024-2030 jyldarǵa arnalǵan qaýipsiz eńbek tujyrymdamasy HEU-men Qazaqstanda, onyń ishinde taý-ken ónerkásibinde anaǵurlym qaýipsiz eńbekti qamtamasyz etý jónindegi aǵymdaǵy yntymaqtastyqpen tolyq baılanysty. Biz bul jumystyń odan ári damýyn asyǵa kútemiz, — dedi Jılber Ýngbo.
HEU — Birikken Ulttar Uıymynyń eńbek qatynasyn retteý jónindegi mamandandyrylǵan mekemesi, onyń quramyna Qazaqstandy qosqanda 187 memleket kiredi.
Eńbek jáne halyqty áleýmettik qorǵaý mınıstri Svetlana Jaqypova Qazaqstan HEU Bas dırektorynyń áleýmettik ádilettilik úshin Jahandyq koalıtsııa qurý týraly bastamasyn qoldaıtynyn jáne onyń jumysyna belsendi qatysýǵa daıyn ekenin atap ótti.
— Koalıtsııaǵa qosylý arqyly biz barlyq azamattarǵa áleýmettik ádilettilikke qol jetkizý úshin teń múmkindikter beremiz. Jasandy ıntellektiń qarqyndy damýy jańa sheshimderdi qajet etedi. Avtomattandyrý jáne tsıfrlandyrý eńbek naryǵyn ózgertedi, al etıkalyq máseleler ózekti bola túsýde. Sondyqtan bilim ekonomıkasyna birqalypty kóshýdi qamtamasyz etý jáne áleýmettik teńdikti saqtaý memleket úshin mańyzdy mindetke aınalýda, — dedi EHÁQM basshysy.
Svetlana Jaqypova áleýmettik-eńbek salasyn tsıfrlyq transformatsııalaýdyń negizgi qaǵıdattary týraly aıtty.
— Mınıstrlik áleýmettik-eńbek salasynda kórsetiletin memlekettik qyzmetterdi damytý boıynsha júıeli jumys júrgizýde. Ásirese, proaktıvti kórsetiletin memlekettik qyzmetterdiń damýyn erekshe atap ótkim keledi. Bul áleýmettik qyzmetterge qol jetkizýdi jeńildetýge jáne olardy derbestendirýge baǵyttalǵan tsıfrlyq memlekettik basqarýdy damytýdaǵy mańyzdy kezeń. Qazaqstannyń áleýmettik-eńbek salasyn tsıfrlyq transformatsııalaý jahandyq maqsattarmen úndestirilip júzege asyrylýda. Biz HEU-nyń negizgi bastamalaryn belsendi túrde biriktiremiz, bul eldiń ádildik pen áleýmettik qorǵaý qaǵıdattaryna negizdelgen qoǵam qurýǵa beıildiligin kórsetedi, — dep atap ótti Svetlana Jaqypova.
Eńbek jáne halyqty áleýmettik qorǵaý mınıstri Tsıfrlyq otbasy kartasyn engizý nátıjesin bólisti.
— OTsK arqasynda qazaqstandyqtar qosymsha ótinish bermeı, túrli qyzmetterdiń 30-dan astam túrin avtomatty túrde ala alady. Іske qosylǵan platforma qazaqstandyqtardyń ómirine aıtarlyqtaı áser etti: iske qosylǵan sátten bastap 2,2 mıllıonnan astam azamat qajetti áleýmettikqyzmetterdi aldy. OTsK kómek alý protsesin jeńildetip qana qoımaı, áleýmettik qoldaýdyń ataýlylyǵyn qamtamasyz ete otyryp, memlekettik resýrstardy paıdalanýdyń tıimdiligin arttyrdy, — dep atap ótti EHÁQM basshysy.
Eske sala keteıik, munyń aldynda Halyqaralyq eńbek uıymynyń bas dırektory Jılber Ýngbo QR Kásipodaqtar federatsııasynda bolyp, eńbek salasyndaǵy ózekti máselelerdi talqylaǵan bolatyn.
