Jyl sońyna deıin geologııalyq materıaldar 100% tsıfrlandyrylady
ASTANA. KAZINFORM — Qazaqstanda geologııalyq materıaldardyń 97,5%-y tsıfrlandyryldy, al jumystardy tolyq aıaqtaý 2026 jyldyń sońyna deıin josparlanǵan, dep habarlaıdy Geologııa komıtetiniń baspasóz qyzmeti.
Qazaqstanda Memleket basshysynyń el aýmaǵyn zertteý deńgeıin arttyrý, ınvestıtsııalyq tartymdylyǵyn kúsheıtý jáne geologııalyq derekterge ashyq qoljetimdilikti qamtamasyz etý maqsatynda geologııalyq aqparatty tsıfrlandyrý jáne júıeleý úderisin jedeldetý jónindegi tapsyrmasy aıasynda ulttyq baǵdarlama iske asyrylyp jatyr.
Geologııalyq aqparatty tsıfrlandyrý (skanerleý) jasandy ıntellektti qoldaný arqyly zamanaýı tsıfrlyq jáne taldamalyq quraldardy engizýge negiz qalyptastyrady, sondaı-aq memleket, ınvestorlar jáne kásibı qoǵamdastyq úshin geologııalyq aqparattyń ashyqtyǵy men qoljetimdiligin arttyrýǵa yqpal etedi.
— Búgingi kúni 66 180 ekinshi rettik geologııalyq esep qurylymdalyp, olardyń alǵashqy tomdaryna Jer qoınaýyn paıdalanýdyń biryńǵaı portalynda (JPBP) qoljetimdilik berilgen. Bul múddeli paıdalanýshylarǵa geologııalyq qorlarǵa barmaı-aq, materıaldardyń jalpy bólimimen onlaın jáne aqysyz túrde tanysýǵa múmkindik beredi. Ekinshi rettik geologııalyq esepterdi skanerleý jumystary 2000-jyldardyń basynda bastalǵan. Jalpy alǵanda, shamamen 4,7 mln geologııalyq materıal tsıfrlandyryldy, bul bastapqy geologııalyq aqparattyń jalpy kóleminiń 97,5%-yn quraıdy, — delingen komıtet habarlamasynda.
Onyń ishinde tsıfrlyq formatqa kóshirilgeni:
— 2023–2024 jyldary — 2 728 620;
— 2025 jyly — 1 969 216.
Sonymen qatar, geologııalyq qorlarda saqtalǵan basym bastapqy geologııalyq aqparattyń jalpy kólemi shamamen 5 mln-dy quraıdy. Jer qoınaýy týraly derekter qaǵaz tasymaldaǵyshtar, grafıkalyq qosymshalar, magnıttik taspalar jáne kartrıdjder túrinde usynylǵan.
Geologııalyq aqparatty tsıfrlandyrýdyń (skanerleýdiń) tolyq tsıkli 2026 jyldyń sońyna deıin aıaqtalady dep josparlanǵan. Nátıjesinde arhıvtik materıaldardyń 100 paıyzdyq qamtylýy qamtamasyz etiledi.
Osyǵan deıin Prezıdent geologııa salasyn damytýǵa jeke kapıtal tartý Úkimettiń asa mańyzdy mindeti ekenin basa aıtqan edi.