Jyl sońyna deıin 2 myń mektep Ilon Mask ınternetine qosylady
ASTANA. KAZINFORM — Jyl sońyna deıin Qazaqstanda 2000-ǵa jýyq mektep Starlink spýtnıktik ınternetine qosylady. Bul týraly QR Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev aıtty.
«Starlink — iri jahandyq kompanııa. Qazirgi ýaqytta ol bizde pılottyq rejımde bar. Jyl sońyna deıin 2000-ǵa jýyq mektep Starlink termınalyn alady dep josparlap otyrmyz. Biz Starlink-pen tıisti ınfraqurylymdy ıntegratsııalaý úshin, bul tehnologııany kópshilikke shyǵarý úshin kelissózder júrgizip jatyrmyz», — dedi mınıstr Úkimet úıinde ótken brıfıngte.
Alaıda mınıstr elimizde Starlink-ten ózge de kompanııalar bar ekenin atap ótti.
«Bizde OneWeb sııaqty Starlink-ten de basqa basqa sheshimder bar. OneWeb qazir baılanys stantsııasyn ornatyp jatyr. Meniń oıymsha, olar 2025 jyldyń basynda osy qyzmetterdi kommertsııalyq negizde usyna alady. Sondyqtan bul naryq básekege qabiletti bolýy kerek dep sanaımyn. Biz osyndaı tehnologııalardy kóbirek shaqyrýymyz kerek, biraq osy tehnologııalyq sheshimderdi engizýge umtylys pen ulttyq qaýipsizdik arasynda tepe-teńdik bolýy qajet», — dep tolyqtyrdy Jaslan Mádıev.
