Jyl sońyna deıin 165 mektep paıdalanýǵa beriledi – Edil Ospan
Bıyl jyl sońyna deıin 165 jańa mektep paıdalanýǵa beriledi. Bul týraly Oqý-aǵartý vıtse-mınıstri Edil Ospan aıtty, dep habarlaıdy Kazinform.
«Oqý-aǵartý mınıstrligi elimizdegi oqýshy oryndarynyń tapshylyǵyn, apatty mektepterdi joıý jáne úsh aýysymdy mektepterdiń máselelerin sheshý baǵytynda keshendi jumys júrgizýde. Úkimet tarapynan jyl saıyn mektepterdi salýǵa jáne jańǵyrtýǵa qarjy bólinip keledi. Máselen, sońǵy 3 jyldyń ózinde 340 myń oqýshy orynǵa arnalǵan 626 mektep paıdalanýǵa berildi. Osy jyldyń sońyna deıin 137 700 oqýshy ornyna arnalǵan 165 mektepti paıdalanýǵa berýdi josparlap otyrmyz. Bul - Bilim ınfraqurylymdaryn qoldaý qorynyń, respýblıkalyq jáne jergilikti bıýdjetterdiń, áleýmettik baǵdarlamalar men jeke ınvestorlardyń esebinen salynyp jatqan nysandar», - dedi vıtse-mınıstr «Samuryq-Qazyna» qorynyń baspasóz qyzmeti alańynda ótken baspasóz máslıhatynda.
Onyń atap ótýinshe, jan basyna shaqqanda qarjylandyrýdy engizý elimizde jekemenshik mektepter ashý dınamıkasyna oń áserin tıgizip otyr. Sońǵy 3 jyldyń kóleminde elimizde 300-den astam jekemenshik mektepter salynyp, qoldanysqa berildi.
«Oqýshy oryndarynyń tapshylyǵyna baılanysty máselelerdi júıeli túrde sheshý úshin «Jaıly mektep» jobasy iske qosyldy. Ulttyq joba aıasynda 740 myń oqýshy ornyn qamtıtyn 369 jańa mektep salynady. Mektepterdiń jobalyq qýaty 300-den 2 500 orynǵa deıin bolady. Bul mektepter eń aldymen oqýshy orny tapshy jáne asa ózekti apatty mektepterdiń ornyna salynatyn bolady. Jańa mektepterdi salý kezinde mınıstrlik ákimdiktermen birge árbir óńirdiń, árbir eldi mekenniń bala sanynyń ósý dınamıkasyna, kóshi-qon protsesterine taldaý júrgizip, sonyń nátıjesine arqa súıep otyrady. Sondyqtan josparlanǵan jaıly mektepterdiń basym bóligi Astana, Almaty qalalarynda, Túrkistan, Almaty, Mańǵystaý, Qyzylorda oblystaryna tıesili. Bul óńirlerde oqýshy sanynyń udaıy ósý tendentsııasy bar», - dedi Edil Ospan.
Vıtse-mınıstrdiń atap ótýinshe, mınıstrlik ulttyq jobany tıimdi iske asyrý úshin qajetti barlyq normatıvtik bazany ázirledi. Turaqty negizde úılestirý jumystary júrgizilip, ádistemelik qoldaý qamtamasyz etilýde. Osy jumystardyń aıasynda mektepterdi jıhazben jáne tehnologııalyq jabyqtarmen jaraqtandyrý normalary, sonymen qatara jańa mektepterdi jumys isteıtin qyzmetkerlerdiń shtattyq kestesi ázirlenip, «Samruk-Kazyna Construction» kompanııasyna jobalyq-smetalyq qujattardy ázirleý kezinde paıdalaný úshin berildi.
