Jyl sońyna deıin 1 mln gektar jer memleket menshigine qaıtarylady

ASTANA. KAZINFORM – Osy jyl sońyna deıin 1 mln gektar jer memleket menshigine qaıtarylady. Bul týraly Bas prokýratýradan málim etti.

«Prokýratýra organdary aýyl sharýashylyǵy maqsatyndaǵy paıdalanylmaǵan jáne zańsyz berilgen jerlerdi qaıtarý boıynsha respýblıka deńgeıinde jumystardy júrgizýde. Ýchaskelerdiń eń kóp sany Aqmola, Aqtóbe, Atyraý, Qostanaı, Mańǵystaý,Pavlodar oblystarynda qaıtarylǵan. Osy jylda da búkil el boıynsha memleketke shamamen 1 mln gektar jer ýchaskelerin qaıtarý josparlanǵan», - dep atap ótedi Bas prokýratýradan agenttiktiń resmı saýalyna oraı.

Aıta keteıik, sońǵy 4 jylda memleketke 17 mıllıon gektar jer qaıtarylyp, aınalymǵa engizildi. Jaıylym tapshylyǵy 29 mıllıon gektardan 8 mıllıon gektarǵa deıin, ıaǵnı 4 ese qysqardy. Jerge úlesi bar 11 myń adamnyń quqyǵy qorǵaldy.