Jyl saıyn qazaqstandyqtarǵa 70 myńnan astam protezdik-ortopedııalyq ónim beriledi
ASTANA. KAZINFORM – 95,3 myń adam protezdik-ortopedııalyq kómekke alatyndar sanatyna jatqyzylǵan. Bul týraly QR Eńbek jáne halyqty áleýmettik qorǵaý mınıstrliginiń apparat basshysy Nurdáýlet Tóleev málim etti.
- Qazir elimizdegi 737 myńǵa jýyq múgedektigi bar adam tirkelgen. Onyń ishinde 95,3 myńy protezdik-ortopedııalyq kómekke alatyndar sanatyna jatqyzylǵan. Bul rette, osy kómek túrimen 82,8 myń adam, ıaǵnı 86,9 paıyzy qamtylǵan, - dedi N.Tóleev Senatta protezdik-ortopedııalyq kómek máselesin talqylaý kezinde.
Onyń aıtýynsha, 2021 jyldan bastap múgedektigi bar adamdar áleýmettik qyzmetter portaly arqyly tehnıkalyq jabdyqtar men qyzmetterdi, sonyń arasynda protezdik-ortopedııalyq kómekti óndirýshiler men jetkizýshilerdi óz betinshe tańdaýǵa quqyly. Qazir portalda 313 protezdik-ortopedııalyq zatty jetkizýshi tirkelgen.
- Tıisti klassıfıkatorda protezdik-ortopedııalyq quraldardyń 19 túri jáne 47 kishi túri qarastyrylǵan. Jyl saıyn 70 myńnan astam osyndaı ónim muqtaj azamattarǵa beriledi. 2024 jyly qamtamasyz etilgenderdiń úlesi muqtajdardyń jalpy sanynyń 87 paıyzyn qurady, - dedi ol.
Budan buryn habarlanǵandaı, 2025 jyldyń basynyn bastap múgedektik tobyn belgileý úshin medıtsınalyq-áleýmettik saraptama júrgizýdiń syrttaı formaty boıynsha pılottyq jobany iske asyrý sheńberinde Qazaqstannyń barlyq óńirinen 43,7 myń ótinim qaraldy.