Jyl basynan kókjóteldiń 14 jaǵdaıy anyqtaldy
ASTANA. KAZINFORM - Epıdemıologııalyq maýsymnyń basynan bastap jyldyń osy ýaqytyna tán ınfektsııalarmen syrqattanýshylyqtyń monıtorıngi jalǵasyp jatyr. Júktemeniń saqtalýyna qaramastan, jaǵdaı turaqty deńgeıde qalyp otyr.
27 qańtar men 1 aqpan aralyǵynda shamamen 130 myń jaǵdaı anyqtaldy – bul bir apta burynǵy deńgeımen birdeı deńgeıde.
Qazan aıynan bastap elde JRVI-diń 2,65 mln jaǵdaıy tirkeldi, aýyrǵandardyń 66%-y 14 jasqa deıingi balalar. Bul rette ótken jyldyń sáıkes kezeńimen salystyrǵanda syrqattanýshylyq 20%-ǵa tómendedi. Pnevmonııa boıynsha oń úrdis baıqaldy - ótken aptada 4 189 jaǵdaı anyqtaldy, bul ótken aptamen salystyrǵanda 18%-ǵa az. Ótken aptada qyzylshanyń 49 jaǵdaıy tirkeldi - bul burynǵyǵa qaraǵanda 23-ke kóp. Jyl basynan beri 113 jaǵdaı rastaldy, aýyrǵandardyń kópshiligi 14 jasqa deıingi balalar (86%). Taralýdyń negizgi sebebi - vaktsına almaǵan: aýyrǵandardyń 86%-y vaktsınatsııalanbaǵan, - delingen DSM taratqan habarlamada.
27 qańtar men 1 aqpan aralyǵynda kókjóteldiń 14 jaǵdaıy anyqtaldy, bul aldyńǵy 7 kúnmen salystyrǵanda 3-ke kóp. Jyl basynan beri 69 jaǵdaı, onyń 67-si 14 jasqa deıingi balalarda tirkeldi. Infektsııalyq aýrýlardyń, sonyń ishinde kókjótel profılaktıkasynyń negizgi quraly, eń aldymen vaktsına alý.
Sońǵy aptada elde COVID-19-nyń 15 jaǵdaıy tirkeldi. Jyl basynan beri barlyǵy 66 jaǵdaı anyqtaldy, ólim joq.
Jaǵdaı turaqty bolyp otyr: ınfektsııalyq tósekter 37%-ǵa, al reanımatsııalyq tósekter 3%-ǵa ǵana júktelgen, bul aýrýdyń aýyr túrleriniń joqtyǵyn jáne densaýlyq saqtaý júıesine joǵary júktemeniń joqtyǵyn kórsetedi.
Mańǵystaý oblysynda 31 qańtar men 1 aqpan aralyǵynda Jańaózen qalasy Qyzylsaı kentindegi mektepke deıingi uıymnyń qyzmetkerleri men balalar arasynda 37 taǵamdyq toksıkoınfektsııa jaǵdaıy tirkeldi. Qazir statsıonarda 13 adam, 24 adam ambýlatorııalyq em alyp jatyr. Sońǵy táýlikte jańa jaǵdaılar anyqtalǵan joq, jaǵdaı turaqtandyryldy. Epıdemııaǵa qarsy is-sharalar jalǵasyp jatyr.
Birqatar ınfektsııalyq aýrý boıynsha oń dınamıka baıqalady, bul rette turǵyndardy qyzylshaǵa jáne kókjótelge qarsy ımmýndaý qarqynyn kúsheıtý qajet, sebebi syrqattanýshylardyń kópshiligi vaktsına almaǵan.