Jyl basynan beri Ózbekstan gaz ımportyn ulǵaıtty

TAShKENT. KAZINFORM – Ústimizdegi jyldyń alǵashqy úsh aıynda Ózbekstan shet elderden 360,2 mln dollardyń gazyn ımporttady, dep habarlaıdy Kazinform agenttiginiń Tashkenttegi menshikti tilshisi Álıhan Asqar.

Ózbekstan Statıstıka agenttiginiń málimetinshe, ótken jyldyń sáıkes kezeńimen salystyrǵanda bıyl ımporttalǵan gazdyń kólemi 2,4 ese kóp. Byltyr osy aralyqta atalǵan el 152,9 mln dollarǵa kógildir otyn satyp alǵan edi.

Sonymen qatar bul kórsetkish 2023 jyly bolǵan jalpy gaz ımportynyń jartysynan (byltyrǵy jalpy ımport - $694,9 mln) asyp tústi.

Al jyl basynan beri Ózbekstan 45,4 mln dollarǵa baǵalanǵan kógildir otyndy eksporttaǵan. Atap aıtqanda, qańtarda - $21 mln, aqpanda - $5,7 mln jáne naýryz aıynda $18,7 mln.