Jyl basynan beri bıýdjet túsimi 106,4% oryndaldy

ASTANA. KAZINFORM — Bıylǵy jartyjyldyqta memlekettik bıýdjettiń kiristeri shamamen 11 trln teńgeni nemese jospardyń 106,4% qurady. Qarjy mınıstri Mádı Tákıev birinshi jartyjyldyq qorytyndysyn baıandady.

— Respýblıkalyq bıýdjet 31 mlrd teńgeden asa artyǵymen oryndalyp, 100,5% atqaryldy. Jergilikti bıýdjetter de senimdi ósim kórsetti: kirister 117% nemese 656,6 mlrd teńgege atqaryldy, — dedi M. Tákıev Úkimettiń búgingi otyrysynda.

Ótken jyldyń 6 aıymen salystyrǵanda kiristerdiń ósý qarqyny memlekettik bıýdjet boıynsha 118,8%, onyń ishinde respýblıkalyq bıýdjet boıynsha 122% jáne jergilikti bıýdjet boıynsha 114,3% qurady.

Sonymen qatar, salyqtyq, kedendik ákimshilendirýdiń arqasynda 492 mlrd teńge qosymsha túsimder qamtamasyz etildi.

Jyl basynan beri qosylǵan qun salyǵyn qaıtarý kólemi ótken jyldyń deńgeıinen 12% artyq oryndalyp, 768 mlrd teńgeni qurady.

Sondaı-aq, memlekettik bıýdjet shyǵystary 92%, respýblıkalyq bıýdjet 91,5%, jergilikti bıýdjet 96,3% atqaryldy.

— Respýblıkalyq bıýdjettiń negizgi shyǵystary myna salalarǵa baǵyttaldy: áleýmettik blokqa — 4,3 trln teńge; óńirlerdi qoldaýǵa — 3,6 trln teńge; naqty sektorǵa — 800 mlrd teńge bólindi. Jergilikti bıýdjetter áleýmettik sala men negizgi qyzmetterdiń basymdyq bere otyryp qarjylandyryldy. Jalpy soma 8 trln teńgeni qurady, — dedi M. Tákıev.

Aıta keteıik, búgin Úkimette bıylǵy qańtar-maýsym aılaryndaǵy áleýmettik-ekonomıkalyq damý jáne respýblıkalyq bıýdjettiń atqarylý qorytyndylary qaralyp jatyr. Qazaqstan ekonomıkasy 6 aıda 6,2 paıyz ósim kórsetken.