Jyl basynan beri AQSh-ta 2000-nan asa meksıkalyq ustaldy — Meksıka prezıdenti

ASTANA. KAZINFORM — Meksıka prezıdenti Klaýdııa Sheınbaým seısenbi kúni Ulttyq saraıda ótken tańerteńgi brıfıngte bıyl qańtar aıynan beri AQSh-ta barlyǵy 2382 meksıkalyq ustalǵanyn habarlady, dep jazady Sınhýa.

Onyń aıtýynsha, jalpy ustalǵandardyń 1390-y, ıaǵnı 58,3%-y, 6 maýsymnan 20 qazanǵa deıingi aralyqta AQSh úkimeti júrgizgen ımmıgratsııalyq reıdter kezinde quryqtalǵan kórinedi.

Klaýdııa Sheınbaým ustalǵandardyń quqyqtyq mártebesine qatysty tolyq aqparattyń áli berilmegenine alańdaýshylyq bildirdi.

— Biz sol jerde bizdiń baýyrlarymyzǵa kórsetilip jatqan qarym-qatynasqa qarsymyz, — dedi prezıdent AQSh-taǵy ımmıgratsııalyq reıdterdi meńzep.

Meksıka AQSh-qa óziniń birneshe dıplomatııalyq nota jibergenin jáne quqyqtyq keńes qajet etetin azamattarǵa adam quqyqtarynyń buzylýy týraly aryz berý úshin kómek kórsetip jatqanyn rastady.

Prezıdent Klaýdııa Sheınbaým zardap shekkender tıisti shaǵymdardy ózi berýi tıis ekenin jáne sonda ǵana konsýldyq qoldaý men ári qaraı quqyqtyq kómek kórsetiletinin atap ótti.

Budan buryn Іshki qaýipsizdik mınıstri Krıstı Noem seısenbi kúni AQSh pen Meksıka arasyndaǵy qabyrǵa zańsyz mıgratsııaǵa tosqaýyl bolý úshin basynan sońyna deıin qara túske boıalatynyn málimdedi.

Sondaı-aq, AQSh úkimeti Tramp ákimshiliginiń esirtki kartelderi men olardyń odaqtastaryna qarsy kúresti kúsheıtý aıasynda meksıkalyq 50 saıasatker men memlekettik sheneýnikter vızalarynyń kúshin joıdy.