Jyl basynan beri 37,7 myń qazaqstandyq baknrot dep tanylǵan
ASTANA. KAZINFORM — Ortalyq kommýnıkatsııalar qyzmetinde jeke tulǵalardy bankrot dep taný qyzmetine júgingenderdiń statıstıkasy málim boldy. Memlekettik kirister komıteti tóraǵasynyń orynbasary Seıiljan Ahmetovtiń aıtýynsha, sottan tys bankrottyq rásimdeý qyzmetine suranys joǵary.
— 2023 jyly bankrottyqqa tapsyrǵan azamattardyń ótinishter sany 77 380 bolsa, 2024 jyly — 83 057, al 2025 jyldyń 3 aıynda 37 746 boldy. Azamattar arasynda sottan tys bankrottyq rásimi eń kóp suranysqa ıe bolyp qala bermek. Óıtkeni bul tásil boryshkerdi bankter men mıkroqarjy uıymdarynyń, kollektorlyq agenttikterdiń aldyndaǵy mindettemeden bosatady. Atalǵan rásim sheńberinde 2023 jyly 8 255, 2024 jyly 11 533, 2025 jyldyń 3 aıynda 2 366 azamat bankrot dep tanyldy, — dedi Seıiljan Ahmetov.
Túrli sebeptermen bankrottyq rásimnen orta jolda bas tartatyndardyń sany azaıǵan. 2023 jyly bas tartý sany 62 738 bolsa, 2024 jyly — 59 792-ǵa túsken.
— Sot arqyly bankrot dep tanylǵandardyń sany da ósti. Máselen, 2023 jyly tek 1 azamat bankrot dep tanylsa, 2024 jyly — 135, 2025 jyldyń basynan 23 adam sot sheshimimen bankrot dep tanyldy, — dedi komıtet basshysynyń orynbasary.
Buǵan deıin Atyraý oblysynda jyl basynan beri 252 dármensiz boryshker bankrot dep tanylǵanyn jazǵan edik.