Jumys kúshi tapshy óńirlerge 2 myńnan astam adam kóship bardy
ASTANA. KAZINFORM – 2025 jylǵy 1 shildedegi jaǵdaı boıynsha erikti qonys aýdarý sheńberinde jumys kúshiniń utqyrlyǵyn arttyrý úshin jumys kúshi artyq óńirlerden jumys kúshi tapshy óńirlerge 2 202 adam, onyń ishinde 1 091 qandas jáne 1 111 qonys aýdarýshy kóship keldi.
Barlyq qonys aýdarýshyǵa memlekettik qoldaý sharalary kórsetildi. Osy jyldyń sońyna deıin 9 653 adamdy kóshirý josparlanyp otyr.
Óńirler boıynsha: Pavlodar oblysyna — 672 adam, Soltústik Qazaqstan oblysyna — 532 adam, Qostanaı oblysyna — 330 adam, Aqmola oblysyna — 215 adam, Shyǵys Qazaqstan oblysyna — 214 adam, Abaı oblysyna — 145 adam, Atyraý oblysyna — 90 adam, Ulytaý oblysyna — 4 adam qonys aýdardy.
Qonystaný aımaqtaryna kóshken qandastarymyz negizinen Ózbekstannan — 396 adam, Mońǵolııadan — 310 adam, QHR — 286 adam, Reseıden — 52 adam, basqa elderden — 47 adam kelgen.
Eńbekke qabiletti jastaǵy 790 adam kelgenderdiń ishinen turaqty jumys oryndaryna 374 adam jumysqa ornalastyryldy, 10 adam kásipkerlik qyzmetpen aınalysady.
Qonys aýdarýshylar men kandastar densaýlyq saqtaý, aýyl sharýashylyǵy, bilim berý, ónerkásip jáne t. b. salalar boıynsha jumysqa ornalasty.
Tamara Aınaddınova qonys aýdarýdyń ómirindegi oń ózgeris bolǵanyn atap ótti.
— Men Jambyl oblysynan Taıynsha aýdanyndaǵy Kellerovka aýylyna sonaý 2022 jyly kóship keldim. Qonys aýdarýǵa arnalǵan oblystyq kvotaǵa engizilgennen keıin kóship-qoný úshin qarjylaı kómek, sondaı-aq turǵyn úıdi jalǵa alý jáne kommýnaldyq qyzmetterge jumsalǵan shyǵyndardy óteý úshin sýbsıdııalar túrinde memlekettik qoldaýǵa ıe boldym, — dedi ol.
Tamara Aınaddınova M. Qozybaev atyndaǵy Soltústik Qazaqstan ýnıversıtetin hımııa pániniń muǵalimi mamandyǵy boıynsha bitirgen. Jańa turǵylyqty jerine kelgennen keıin Keńes Odaǵynyń Batyry I. M. Berejnoı atyndaǵy Keller orta mektebine mamandyǵy boıynsha jumysqa ornalasty. Qazir balasyna kútim jasaý úshin dekrettik demalysta.
— Kóshýge sheshim qabyldaǵanymyzǵa, qonys aýdarýshylarǵa jumys taýyp berýge kómektesetin, alǵashqy qarjylyq kómek kórsetetin memleketten baǵdarlama baryna óte qýanyshtymyn. Men osy jerde otbasyn qurdym, — deıdi keıipkerimiz.
Esterińizge sala keteıik, erikti qonys aýdarý aıasynda qonys aýdarýshylarǵa memlekettik qoldaýdyń mynadaı sharalary usynylady:
— otaǵasyna jáne otbasynyń árbir múshesine 70 AEK mólsherinde kóshýge arnalǵan bir rettik sýbsıdııa;
— otbasy músheleri sany men eldi mekenge baılanysty 15-ten 30 AEK-ke deıingi mólsherde 12 aı ishinde turǵyn úı jaldaýǵa jáne kommýnaldyq qyzmetterge aqy tóleýge aı saıynǵy sýbsıdııalaý;
— qysqa merzimdi kásiptik oqytýǵa joldama;
— jumysqa ornalasýǵa nemese kásipkerlik bastamany damytýǵa járdemdesý;
— ekonomıkalyq utqyrlyq sertıfıkattaryn berý.
Budan basqa, óńiraralyq qonys aýdarýǵa járdem kórsetetin jumys berýshilerge turǵyn úımen qamtamasyz etilgen jáne keminde 2 jyl merzimge turaqty jumysqa qabyldanǵan árbir qyzmetker úshin 400 AEK mólsherinde jumysqa ornalasýǵa birjolǵy sýbsıdııa beriledi.
Aıta ketelik elde demografııa jáne kóshi-qon salasyn retteıtin memlekettik organ qurý usynylǵan edi.