Jyl basynan beri 14 jasqa tolmaǵan 6 qyz júkti bolǵan

ASTANA. KAZINFORM – Jyl basynan beri 18 jasqa deıingi jetkinshekter arasynda 1651 júktilik jáne 257 abort tirkeldi. Bul týraly QR DSM Analar densaýlyǵyn saqtaý basqarmasynyń basshysy Shákızat Halyqova aıtyp berdi.

Onyń aıtýynsha, Densaýlyq saqtaý mınıstrligi aı saıyn jasóspirimder júktiligine monıtorıng júrgizip otyrady.

«Aı saıyn 18 jasqa deıingi júktilik pen abort sany qaralyp otyrady. Byltyr 2023 jyldyń 9 aıynda jasóspirimder arasynda 2288 júktilik pen 385 abort tirkelgen edi. Al bıylǵy 9 aıda – 1651 júktilik jáne 257 abort bolǵan», - dedi Sh. Halyqova Ortalyq kommýnıkatsııalar qyzmetinde ótken baspasóz máslıhatynda.

Sonymen birge, spıker 14 jasqa deıingi jáne 15-17 jas aralyǵyndaǵy júktilik statıstıkasy bólek júrgiziletinin atap ótti.

«Ótken jyly 14 jasqa tolmaǵan qyzdar arasynda 9 júktilik jaǵdaıy anyqtaldy. Árıne mundaı erte jasta kóp jaǵdaıda zorlyq-zombylyq saldarynan júkti bolǵan jaǵdaılar bar, bul endi Ádilet mınıstrliginiń quzyryndaǵy aqparat. Bizdiń mindetimiz – júktiliktiń barlyq kezeńinde medıtsınalyq kómek kórsetý jáne bul kómekter tolyqqandy kórsetildi. Bıyl 14 jasqa tolmaǵan 6 qyz bala kótergen», - dep tolyqtyrdy Sh. Halyqova.

Aıta keteıik, Qazaqstanda júkti áıelderdi skrınıngpen qamtý 10% ósti. Búgingi tańda 270 myńǵa jýyq áıel júktilik boıynsha esepte tur.