Jyl basynan beri 11 myńnan astam kıberqylmys tirkeldi — ІІM

ASTANA. KAZINFORM — Sońǵy 8 jylda kıberqylmys, ınternet alaıaqtyq sany 10 ese artqan. Bul týraly Іshki ister mınıstrligi kıberqylmysqa qarsy is-qımyl departamentiniń bastyǵy Jandos Súıinbaı málim etti.

— Zamanaýı telekommýnıkatsııalyq jáne baılanys quraldaryn paıdalaný arqyly jasalatyn qylmystardyń jańa túri qalyptasyp jatyr. Ókinishke qaraı, Qazaqstan da bul qatermen betpe-bet kelip otyr. Bundaı qylmystardyń basym bóligi — ınternet-alaıaqtyq. IT tehnologııanyń qarqyndy damýyna baılanysty, sońǵy 8 jylda mundaı qylmystar sany 10 eseden astam ósti. Jyl basynan beri (6 aıda) 11 myńnan asa (11 661) osyndaı qylmys tirkeldi, — Jandos Súıinbaı ortalyq kommýnıkatsııalar qyzmeti alańynda ótken baspasóz máslıhatynda.

Osy oraıda Іshki ister mınıstrligi kıberqylmysqa qarsy sharalardy qatańdatyp jatyr. 

— Memleket basshysynyń tikeleı tapsyrmasymen byltyr qarashada Іshki ister mınıstrliginiń qurylymynda óńirlik bólinisteri bar arnaıy departament quryldy. Bul bólinister tek kıberqylmystardy ashýmen ǵana emes, sonymen qatar jalpy zańnamalyq, uıymdastyrý, aldyn alý jumysymen de aınalysady, — deıdi vedomstvo ókili.

Eske salaıyq, polıtsııa qyzmeti elimizde keń taraǵan bes kıberqylmys túrin atady.