JI jáne QazTech platformasy: Tsıfrlyq transformatsııa kartalary bir aıda aıaqtalýy tıis
ASTANA. KAZINFORM — Premer-mınıstr Oljas Bektenov Tsıfrlandyrý máseleleri jónindegi komıssııanyń otyrysyn ótkizdi, dep habarlaıdy Úkimettiń baspasóz qyzmeti.
Onda Memleket basshysynyń tapsyrmasy boıynsha iske qosylǵan sýperkompıýter negizinde jasandy ıntellekt ekojúıesin damytý baǵyttary qaraldy. QazTech platformasy bazasynda salalar men memlekettik organdardyń jumysyn odan ári tsıfrlyq transformatsııalaýǵa nazar aýdaryldy.
Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev JI ınfraqurylymyn qurý týraly baıandady. Onyń aıtýynsha, memlekettik organdardyń derekterdi óńdeý ortalyǵy taıaýda iske qosylǵan sýperkompıýterge kiriktirildi. Qazaqstanda ınstıtýtsıonaldyq ortany qalyptastyrý úshin 2024-2029 jyldarǵa arnalǵan JI-di damytý Tujyrymdamasy bekitildi, «Jasandy ıntellekt týraly» zań jobasy ázirlendi. JI salasynda kadrlar daıarlaý úshin AI Corporate, TUMO Center, AI People jáne taǵy da basqa bilim berý baǵdarlamalary iske asyrylady. E-agent, egov AI, AI-terapevt, tax helper, SDU jáne E-aýdarmashy sııaqty ázirlenip jatqan tsıfrlyq sheshimder týraly málimetter tyńdaldy.
Otyrys barysynda salalardy tsıfrlyq transformatsııalaý qarqyny qaraldy. QazTech ulttyq platformasy tsıfrlyq ónimderdi jedel qurýǵa arnalǵan. Mınıstrdiń aıtýynsha, tsıfrlandyrýdyń platformalyq modelin engizý jańa IT-sheshimderdi iske qosý merzimin 1,5-3 jyldan 6 aıǵa deıin qysqartýǵa múmkindik beredi. Platforma biryńǵaı standarttardy, security by design qaǵıdaty boıynsha qaýipsizdikti jáne bultty tehnologııalardy qoldanýdy qamtamasyz etedi. QazTech synaqtary aqparattyq qaýipsizdik talaptaryna sáıkes aıaqtaldy, tolyq iske qosý tamyz aıyna josparlanǵan.
Búgingi tańda QazTech platformasynda memlekettik organdardyń biryńǵaı ınternet-portaly, Smart Bridge, Ekologııa jáne tabıǵı resýrstar mınıstrligine tıesili Qorshaǵan ortanyń ulttyq málimetter bazasy jáne taǵy basqalar jumys isteıdi. Memleket basshysynyń tapsyrmalary sheńberinde barlyq memlekettik organdar bir ýaqytta ozyq halyqaralyq tájirıbege súıene otyryp, sonyń ishinde Sıngapýr tájirıbesin qosa alǵanda, tsıfrlyq transformatsııa kartalaryn ázirleýde. Bul kartalar jasandy ıntellekt pen zamanaýı tehnologııalardy qoldana otyryp, negizgi protsesterdi jeńildetýge jáne jedeldetýge baǵyttalǵan. Basty nazar eskirgen protsedýralardy qaıta óńdeýge, derekterdi tsıfrlandyrýǵa, sondaı-aq, E-Otinish, 109 jáne áleýmettik jeliler arqyly kelip túsken azamattardyń suranystaryn qaıta óńdeýge aýdarylǵan. Kartalar sheńberinde negizgi basymdyq úderisterdiń reınjınırıngine jáne jasandy ıntellektti qosa alǵanda, perspektıvaly tehnologııalardy engizýge berilgen.
Premer-mınıstr iske qosylǵan sýperkompıýterdi qosa alǵanda, qurylyp jatqan JI ulttyq ınfraqurylymy memlekettik organdardyń qyzmetine jasandy ıntellekt engizý jónindegi jumysty jandandyra túsýde úlken múmkindikter beretinine nazar aýdardy.
Oljas Bektenov bir aıdyń ishinde tsıfrlyq transformatsııa kartalaryna qatysty jumysty aıaqtaýdy tapsyrdy. Olar JI-dy ıntegratsııalaýǵa negizi bolmaq, sondaı-aq bızneske de memlekettik derekter bazasynda óz jobalaryn jasaýǵa múmkindik beredi.
Buǵan deıin qazaqstandyq sýperkompıýterdiń qýaty 8 mlrd halyqtyń 4 kúndik jumysyna teń ekeni aıtyldy.