JI terapevt qujattama ýaqytyn 40%-ǵa deıin qysqartýǵa múmkindik beredi
ASTANA. KAZINFORM — Densaýlyq saqtaý mınıstrliginde vedomstvo basshysy Aqmaral Álnazarova men «Qazaqtelekom» AQ Basqarma tóraǵasy Baǵdat Mýsınniń qatysýymen jasandy ıntellekt qoldanylatyn tsıfrlyq sheshimder talqylandy. Bul týraly vedomstvonyń baspasóz qyzmeti málim etti.
Usynylǵan jobalar medıtsınalyq personaldyń qaýipsizdigin arttyrý, aýyl turǵyndary úshin medıtsınalyq kómektiń qoljetimdiligin keńeıtý, sondaı-aq dárigerlerge júktemeni azaıtý máselelerine qatysty boldy.
— Sheshimderdiń biri Aqmola oblysynyń birqatar medıtsınalyq uıymdarynda synaqtan ótip jatqan «JI — terapevt» servısi boldy. Júıe naqty ýaqyt rejıminde dáriger men patsıenttiń arasyndaǵy dıalogty taldaıdy, aldyn-ala dıagnozdy 80% dáldikpen qalyptastyrady jáne dárigerdiń ádettegi qujattama ýaqytyn 40%-ǵa deıin qysqartýǵa múmkindik beredi, — delingen habarlamada.
Taǵy bir ınnovatsııalyq ónim — densaýlyqty qashyqtan baqylaýdy qamtamasyz etetin mobıldik telemedıtsınalyq qosymsha. Onyń kómegimen qazaqstandyqtar qysymdy, ımpýlsti, dene temperatýrasyn, qandaǵy otteginiń deńgeıin jáne glıýkozany ólsheı alady. Medıtsınalyq kómekke qoljetimdilik shekteýli aýyldyq jerlerde servısti paıdalanýǵa erekshe nazar aýdarylady.
Sondaı-aq medıtsına qyzmetkerleriniń qaýipsizdigin arttyrý úshin smart-beınejetondardy engizý jobasy usynyldy. Pılottyq rejımde tehnologııa elordada bes jedel járdem brıgadasynda qoldanylýda jáne jaqyn arada Almatyda iske qosý josparlap otyr. Qurylǵylar qońyraýlardy beınetirkeýge múmkindik beredi jáne tótenshe jaǵdaılarda jedel áreket etý quraly retinde qyzmet etedi.
— Biz úshin medıtsına qyzmetkerleri úshin barynsha qaýipsiz jáne tıimdi jumys jaǵdaılaryn jasaý mańyzdy. Kúzet, shuǵyl áreket etý júıeleri jáne telemedıtsına uıymdary boıynsha jobalar densaýlyq saqtaý aldynda turǵan syn-qaterlerge tolyq jaýap beredi. Biz búkil el boıynsha tabysty tsıfrlyq sheshimderdi keńeıtýge daıynbyz, — dep atap ótti mınıstr.
Óz kezeginde, «Qazaqtelekom» AQ Basqarma tóraǵasy Baǵdat Mýsın medıtsınalyq uıymdarǵa analıtıkamen beınebaqylaý, qoljetimdilikti baqylaý júıeleri, dabyl batyrmalary, polıtsııa departamentteriniń jedel basqarý ortalyqtarymen beınetaspany ıntegratsııalaý sııaqty optsııalardy qamtıtyn keshendi kúzet júıesin usynýǵa daıyn ekenin habarlady.
Kezdesý qorytyndysy boıynsha pılottyq jobalardy keńeıtý jáne Qazaqstannyń medıtsınalyq ınfraqurylymyn odan ári tsıfrlandyrý týraly ýaǵdalastyqqa qol jetkizildi.
Eske sala keteıik, buǵan deıin Nazarbaev ýnıversıtetiniń (NU) ınjeneri Anar Sandyǵulova aýtızm ereksheligi bar balalardy jasandy ıntellektige negizdelgen robot terapııasy arqyly ońaltý ádistemesin ázirlegenin jazǵan edik. Eńbegine avtorlyq quqyq rásimdep te úlgeripti. Endi AQSh pen Eýroodaqtan patent almaqshy.