Jezqazǵanda «Bileýti» etnoaýyly týrısterge esigin ashty
Jobanyń bastamashysy – «Kóbes-Óteý» QB basshysy jáne jergilikti murajaıdyń bas sýretshisi Keshýbaı Baıdildın.
«Eki jyldan artyq men bul ıdeıany júzege asyrýdy oılastyrdym. Basty maqsat – ulttyq qundylyqtardy, dástúrler men qolónerdi jańǵyrtý. Bizdiń birlestik qaıyrymdylyq jáne volonterlik qyzmetpen aınalysady. Bizge jastardy tartý, olarda óz ultyna, jerine jáne tarıhyna degen súıispenshilikti oıatý, olarǵa ulttyq qundylyqtardy sińirý mańyzdy. Qazir barlyq jastar telefondarda, ómirdi tek ekran arqyly kóredi», – deıdi ol.
Keshýbaı Baıdildın bolashaqqa senimmen qaraý úshin óziniń ótkenin, tamyryn bilý kerek dep esepteıdi. Etnoaýyl qazaqtardyń kóshpeli ómiri kezeńine aıaq basýǵa, sol zamannyń turmysy men mádenıetin kórýge múmkindik beredi.
Barlyq karantın talaptaryn saqtaı otyryp uıymdastyrylǵan saltanatty ashylý kezinde etnografııalyq eksponattardyń kórmeleri ótti.
«Shı toqý», «Kıiz basý», «Quraq kórpe jasaý», «Baýyrsaq pisirý», «Qurt jaıý» sııaqty qolóner jáne aspazdyq sheberlik sabaqtary ótti.
Barlyq tilek bildirýshiler qasıetti aǵashqa «Aqtyq baılaý» rásimin jasady. «Bulanty shaıqasy» taqyrybyna ekskýrsııa ótkizildi.
Etnoaýyl aýmaǵynda ulttyq oıyndar alańyna oryn bólingen. Munda asyq atý, sadaq atý, arqan tartý, altybaqan, qappen sekirý oıyndaryn oınaýǵa bolady.
«Bizdiń murajaı ujymy Keshýbaı Baıdildınniń ıdeıasyn qýana qoldady. Etnoaýylda qazaqtyń salt-dástúrlerin jańǵyrtý boıynsha kórmeler, sheberlik sabaqtary, ulttyq taǵamdardan dám tatý jáne salt-dástúrdi dáripteıtin ulttyq oıyndar ótedi», – deıdi Jezqazǵan tarıhı-arheologııalyq murajaıynyń dırektory Raýshan Qaparova.
«Bileýti» etnoaýyly jazdyń sońyna deıin jumys isteıdi. Uıymdastyrýshylar ony jyl saıyn ótkizýdi josparlap otyr.
