Jezqazǵan qalasyndaǵy «Ana úıi» - otbasy jylýlyǵyn syılaıtyn meken
ASTANA. KAZINFORM - Elimizdiń ár óńirinde qurylǵan «Ana úılerinde» 12 jyl ishinde 8 myńnan astam áıel men 8 500 bala qoldaý tapty. Qaıyrymdylyq jobasy demeýshiler men metsenattardyń qoldaýymen qoǵamdaǵy áleýmettik jetimdikti joıýǵa kómektesedi, dep habarlaıdy Kazinform agenttiginiń tilshisi.
«Ana úıi» qoǵamdyq qory óz jumysyn 2013 jyly Aıdyn men Anar Rahymbaevtardyń basshylyǵymen bastaǵan. Bul ıdeıa qazaqstandyq bıznesmender tarapynan qoldaý tapty. Qordyń maqsaty - áleýmettik jetimdiktiń aldyn alý, ata-anasy bas tartqan balalardyń sanyn qysqartý jáne qıyn ómirlik jaǵdaıda balalarymen baratyn jeri joq analarǵa kómek kórsetý.
Búginde Qazaqstannyń 18 qalasynda 21 úı jumys isteıdi. Olardyń biri Jezqazǵan qalasynda ornalasqan. Ol 2016 jyly ashyldy. Segiz jyl ishinde munda 150 áıel men 165 bala qoldaý tapty. Qazir úıde bes bala men tórt áıel turady. Ótken jyly «Qazaqmys korporatsııasy» JShS demeýshilik etip, úıde jóndeý jumystaryn júrgizdi. Endi jaıly ári keń úı jany jabyrqaýly jandarǵa otbasylyq jylýdy sezinýge múmkindik beredi.
- Qazir bizde bir balasy bar kelinshek turady. Onyń jeke kýáligi, al balanyń týý týraly kýáligi joq. Sáıkesinshe, ol bosanǵanǵa deıingi de, bosanǵannan keıingi de tólemderin almaǵan. Endi bizdiń mindetimiz - memleketten tólenetin barlyq áleýmettik járdemaqylardy resimdeýge jáne qujattardy qalpyna keltirýge kómektesý, - deıdi «Ana úıi» QQ-nyń oblys boıynsha óńirlik mamany Gúlnar Birmanova.
2020 jyldan bastap Ulytaý oblysynda «Qazaqmys korporatsııasy» JShS «Analar úıiniń» metsenaty bolyp tabylady. Osy qoldaýdyń arqasynda munda baspana men kómek izdeýshiler úshin jaıly orta qalyptasqan. Olarǵa kıim-keshek pen oıynshyqtar beriledi, sábılerdi kútý úshin barlyq qajetti zattar bar. Mereke kúnderi korporatsııa balalar men olardyń analaryna syılyqtar tabys etedi. Alaıda, olar da qol qýsyryp otyrmaıdy. Jazda qyzdar úıdiń aınalasyna kókónis otyrǵyzyp, qaınatpalar daıyndaıdy.
Sondaı-aq, janashyr kásipkerler Ana úıindegi turǵyndarǵa túrli tegin sheberlik sabaqtaryn uıymdastyrady. Qyzdar aspazdyq, mobılografııa, shashtaraz isi, býhgalterlik esep jáne basqa da daǵdylardy ıgeredi. Jumysqa ornalasýǵa da kómektesedi, bul áıelderge ári qaraı óz betinshe ómir súrýine kóp septigin tıgizedi.
- Ótken jyly bizde eki qyz turǵan. Biz olardy jumysqa ornalastyrýǵa kómek kórsetý úshin «Qazaqmysqa» júgindik. Basshylyq bizdiń ótinishimizdi jerge tastamady - olardy jumysqa aldy. Taǵy bir qyzǵa «ıÝtarııa» kompanııasynan jumys tabyldy. Biz osy kompanııalardyń basshylaryna óte rızamyz. Qamqorlyǵymyzdaǵy qyzdar osynda turyp jatqanda, bolashaqta qajet bolatyn qarajattaryn jınap alýǵa tyrysady, - deıdi Gúlnar Birmanova.
Negizinen, Ana úıi qamqorlyǵyndaǵy adamdar nesıege belshesinen batqan, olardyń kóbinde kartalary buǵattaýly. Sondyqtan «Ana úıiniń» qyzmetkerleri men basshylyǵy áıelderge qarjylyq saýattylyqty ıgerýge jáne bolashaqqa qandaı da bir aqsha jınaýǵa kómektesedi.
- Bizge kelgen keıbir qyzdarda tipti AÁK resimdelmegen. Biz barlyq qujattardy jınap, tıisti organdarǵa tapsyrýǵa kómektesemiz. Bolashaqta biz olardy turǵyn úıdi jalǵa alý úshin eń bolmaǵanda bastapqy soma jınap alýǵa úıretemiz. Olar kóbinese birigip páter jaldaıdy, - deıdi Gúlnar.
Saǵdat Hanjarova - Ana úıiniń turǵyny. 18 jasynda boıjetken júkti bolyp qalǵan. Óz úıi bolmaǵandyqtan, oǵan Gúlnar Birmanova Jezqazǵandaǵy «Ana úıinde» turýdy usynǵan. Saǵdat birden kelistim deıdi. Biraz ýaqyttan keıin ol uldy bolǵan. Qazir ol mobılografııany meńgerip, ýnıversıtette oqıdy.
- Meniń oıymsha, mundaı úıler áıelder úshin óte qajet. Basynda men uıalyp, kimnen keńes pen qoldaý suraıtynymdy bilmedim. Maǵan «Ana úıinde» turýdy usynǵanda, birden kelistim. Osy jerde ulymdy dúnıege ákelip, túrli daǵdylardy ıgere bastadym. Bizge aspazdyq pen mobılografııa boıynsha sheberlik sabaqtary ótkizildi. Sondaı-aq maǵan qujat jınap, ýnıversıtetke túsýge kómektesti. Meniń oıymsha, bolashaqta ózimdi de, balamdy da qamtamasyz etý úshin aıaǵyma nyq tura alamyn, - deıdi Saǵdat Hanjarova.
Qordyń basty maqsattarynyń biri - áıelderge qoǵamǵa beıimdelýge múmkindik berý jáne balalardy qalypty jaǵdaıda tárbıeleýge kómektesý. Qor kóptegen sábıge otbasylyq jylý syılaý úshin balalar jáne sábıler úılerimen tyǵyz baılanysta jumys isteıdi.
- Men bul jerge spırttik ishimdikke salynyp ketkendikten tústim. Komıssııada maǵan eki jol usyndy: ne ata-ana quqyǵymnan aıyrady, ne balalarymmen «Ana úıine» baryp, túzelýge tyrysamyn. Sol kezde meniń egizderim «Sábıler úıinde» jarty jyl turyp jatqan edi. Men olardy sol jerden alyp, osynda keldim. Ana úıi óte jaqsy jáne balalarym jyldam damı bastady. Barlyq qajettiliktermen qamtamasyz etedi. Endi durys ómir súrýge tyrysamyn jáne balalarymdy tárbıeleımin, - deıdi Elena (aty ózgertilgen).
Qyzdar munda túrli jaǵdaımen keledi, ómirde jasalǵan qatelikterdi túzetýge bolatynyn túsinedi. Óıtkeni kez kelgen bala úshin eń jaıly jer - otbasy.