Jetisýda jaz mezgilinde 4 adam sýǵa batyp ketken, onyń ekeýi bala
TALDYQORǴAN. KAZINFORM – Jetisýda shomylý maýsymy bastalǵannan 1 shildege deıin ózen-kólderde 4 adam sýǵa batyp, mert bolǵan. Olardyń ekeýi balalar.
Jetisý oblysynyń Tótenshe jaǵdaılar departamentiniń málimetterinshe, qaıǵyly jaǵdaılardyń barlyǵy shomylýǵa tyıym salynǵan jerlerde bolǵan. 2024 jyldyń sáıkes kezeńinde mundaı oqıǵalar sany beseý bolǵan. Bıylǵy jazda qutqarýshylar 36 adamdy, onyń ishinde 13 balany aman alyp qaldy.
Óńir aýmaǵynda resmı túrde shomylýǵa ruqsat etilgen 5 oryn jáne tyıym salynǵan 76 jer bar. Sý qaýipsizdigin qamtamasyz etý maqsatynda Alakól men Balqash kólderiniń jaǵalaýlarynda, sondaı-aq Taldyqorǵan qalalyq jaǵajaıynda jazǵy maýsym boıy qutqarýshylar kún saıyn kezekshilik atqardy.
2025 jylǵy jazda sýda tártip buzǵany úshin 51 adam ákimshilik jaýapkershilikke tartylyp, jalpy somasy 746 myń teńgeden asatyn aıyppul salyndy. Budan bólek, kólik baqylaý ınspektsııasy shaǵyn kólemdi keme ıeleriniń 208-in paıdalaný erejelerin buzǵany úshin aıyptady.
Osyǵan deıin Qyzylordada shomylý maýsymynda 25 adam sýǵa batyp ketkeni týraly jazdyq.
Sondaı-aq Aqtóbede eki adam sýǵa batyp ketti.