Jetisýdaǵy «Qazaqstan-Qytaı ónerkásiptik qalasy» qashan salynady
Shekaralyq óńirdiń damýyna serpin beretin múmkindiktiń bir kilti kórshi elmen dostyq qarym qatynastyń jolǵa qoıylýynda jatyr. Bul turǵyda Jetisý oblysynyń kórshiles Qytaı halyq respýblıkasymen aradaǵy yntamaqtastyq baılanysy nyǵaıyp keledi, dep habarlaıdy Kazinform.
Bıyl oblys ákimi Beıbit Isabaev bastaǵan jetisýlyq delegatsııa Qytaıdyń Sıamyn qalasyna baryp, «Bir beldeý – bir baǵyt» jobasy aıasynda ótken saýda, ekonomıka jáne ınvestıtsııa jónindegi semınarǵa qatysyp, qos tarap óńirleriniń saýda-sattyq jáne ekonomıkalyq baılanystaǵy múmkindikterin tanystyrǵan bolatyn.
Forým aıasynda Jetisý oblysy aýmaǵyndaǵy «Qazaqstan – Qytaı halyqaralyq ónerkásiptik qalasynyń» qurylysyn aıaqtaý máselesi kóterilip, ınvestıtsııalyq, ekonomıkalyq iskerlik qarym-qatynastar jaıy sóz bolǵan. Kezdesýde sóz bolǵan bastamalar ýáde kúıinde qalmaı, kelisimderdi iz júzine asyrýǵa naqty qadam jasalyp otyr. ıAǵnı, «Qorǵas – Shyǵys qaqpasy» arnaıy ekonomıkalyq aımaǵynda «Qazaqstan-Qytaı halyqaralyq ónerkásip qalasy» jobasyna qatysýǵa nıetti Soltústik-Qytaı elektroenergektıkany jobalaý ınstıtýtynyń konsaltıngtik toby, «Chengdu Keerun Investment» kompanııasy jáne «Shenzhen Eternal Asia Logistic» kompanııasymen memorandým jasalǵan. Qurylysty júrgizetin «Dachjýo» seriktestigi.
Atalǵan «Dachjýo» seriktestigi «Qorǵas – Shyǵys qaqpasy» arnaıy ekonomıkalyq aımaǵynda «Qazaqstan-Qytaı halyqaralyq ónerkásip qalasy» jobasyn júzege asyrady. Kompanııa kólik jáne ınvestıtsııa, qala bezendirý qurylystary salasynda keshendi jobalardy basqarýmen aınalysady. Seriktestik jumysy Qytaıda úlken bedelge ıe. Shırek ǵasyrǵa jýyq ýaqyt ishinde óz eliniń aımaqtarynda 45 fılıalyn ashqan. Jyl saıyn jobalardy basqarýǵa 6,5 trln teńge, al ınvestıtsııalyq jáne qarjylyq qyzmet kórsetý baǵytyna 5,2 trln teńge bólip otyr. Al «Dachjýo» kompanııasy úshin «Qazaqstan-Qytaı halyqaralyq ónerkásip qalasy» sheteldegi eń alǵashqy ınvestıtsııalyq joba bolmaq. Kompanııa qala qurylysyna quny 330 mlrd teńge qarjy quıýdy bastady.
«Qazaqstan-Qytaı halyqaralyq ónerkásip qalasy» jobasy aıasynda salynatyn bolashaq logıstıkalyq tehnoparkte jańa óndirister, damyǵan ınfraqurylym, aýyl sharýashylyǵy ónimderin óńdeý kásiporyndary, saýda-oıyn-saýyq obektileri, fýdkorttar jáne basqa qyzmet kórsetý nysandary bolady dep josparlanǵan. Nátıjesinde jańa jumys oryndary ashylyp, zamanaýı tehnologııalar qoldanysy keńeıedi.
Qazir «Qazaqstan-Qytaı halyqaralyq ónerkásip qalasynda» qurylystyń qazyǵy qaǵylyp, «Qorǵas-Shyǵys qaqpasy» arnaıy ekonomıkalyq aýmaǵynda jer qazý jumystary aıatqalýda. Kásiporyn 200 gektar aýmaqta qurylystyń birinshi kezeńin iske asyryp jatyr. Onyń ishinde ınjenerlik jeliler men magıstraldyq kóshenniń qurylysy da bar. Sondaı-aq qarasha aıynan bastap ınvestorlar ákimshilik ǵımarattar men qonaqúı nysandarynyń qurylysyn bastady.
Jalpy «Qazaqstan-Qytaı halyqaralyq ónerkásip qalasy» jobasy aıasynda 2 myńnan astam jańa jumysy orny ashylmaq. Eńbek kúshi retinde negizinen Qorǵasqa jaqyn eldi meken turǵyndary tartylatyn bolady.
«Qytaımen shekaralas jatqan Jetisý oblysy – ınvestıtsııalyq múmkindigi zor aımaq. Aımaqta 5 strategııalyq baǵyt boıynsha jańa ınvestorlar tartý, óńirdiń ınvestıtsııalyq áleýetin arttyrý jumystary júrgizilýde. Atap aıtqanda, bul baǵytta agroónerkásip keshenin damytý, kólik jáne logıstıka, týrızm, balamaly energetıka jáne ónerkásip, onyń ishinde jer qoınaýyn paıdalanýdy damytý salalary bar. Yntymaqtastyqty damytý úshin Qytaı kompanııalaryn óńirimizdiń ekonomıkasyna ınvestıtsııa salýǵa shaqyryp otrmyz. Bekitilgen kestege sáıkes 200 gektar aýmaqta jerdi tegisteý jumystary júrip jatyr. Qazir qurylys alańynda 22 birlik tehnıka men 35 adam jumys isteýde. Qytaıdan qosymsha 24 birlik tehnıka kelýi tıis, onyń úsheýi Qorǵas qalasyna jetkizildi. Qalǵan 21 tehnıka jyl sońyna deıin ákelinedi dep kútilýde. Jobanyń negizgi qurylys jumystary 2024 jyldyń naýryz aıynda bastalmaq» - deıdi Jetisý oblysynyń ákimi Beıbit Isabaev.
